БИШКЕК, 10-май — Sputnik. Эртең Кыргызстандын Айыл чарба жана мелиорация министрлигинин, Ветеринардык жана фитосанитардык коопсуздук боюнча мамлекеттик инспекциянын адистери казак тараптын картошканы өткөрбөй жаткан себептерин тактоо үчүн Астана шаарына жөнөп кетет. Бул туурасында өкмөттүн маалымат кызматы кабарлады.
Анда Ветеринардык жана фитосанитардык коопсуздук боюнча мамлекеттик инспекциянын директорунун орун басары Руслан Бейшенкулов Казакстан тараптан картошканы алардын аймагына өткөрүү боюнча расмий тыюу салуу боюнча маалымат келе электигин, бирок иш жүзүндө продукцияны сатуу токтоп калгандыгын айткан.
"Эртең Айыл чарба жана мелиорация министрлигинин, Ветеринардык жана фитосанитардык коопсуздук боюнча мамлекеттик инспекциянын адистер тобу казак тарап менен сүйлөшүүлөрдү жүргүзүү жана картошканы экспортоого тыюу салууга негиз болгон фактыларды салыштыруу үчүн Астана шаарына жөнөп кетет", — деп айтты Бейшенкулов кеңешмеде.
Ал 2016-жылдын январынан тарта Казакстандын аймагына 1400 тонна картошка экспорттолуп, ал эми 113 тоннасы андагы ылаң (золотистая нематода) табылгандыгынан улам артка кайтарылгандыгын кошумчалады.
