Премьер картошка экспорту боюнча казактар менен сүйлөшүүнү тапшырды

© Пресс-служба правительства / Сабыр АильчиевПремьер-министр Сооронбай Жээнбеков Кыргызстанда өндүрүлгөн картошканы Казакстандын аймагына киргизүүгө тыюу салуу маселеси боюнча кеңешмеде
Премьер-министр Сооронбай Жээнбеков Кыргызстанда өндүрүлгөн картошканы Казакстандын аймагына киргизүүгө тыюу салуу маселеси боюнча кеңешмеде - Sputnik Кыргызстан
Жазылуу
Кыргызстандык дыйкандардын казак рыногуна өткөрүүгө салынган тыюу боюнча өкмөттүн жыйыны өтүп, анда ЕАЭБ аймагына жасалуучу экспорт маселеси да талкууланды.

БИШКЕК, 10-май — Sputnik. Премьер-министр Сооронбай Жээнбеков Кыргызстанда өндүрүлгөн картошканы Казакстандын аймагына киргизүүгө тыюу салуу маселеси боюнча кеңешме өткөрүп, абалды тез арада чечүү иретинде казак тарап менен сүйлөшүүлөрдү активдештирүүнү тапшырды. Бул туурасында өкмөттүн маалымат кызматы билдирди.

Өкмөт башчы өлкөнүн ЕАЭБге кошулуусу менен дыйкандар аталган уюмга мүчө-өлкөлөрдүн рыногуна кирүүгө кеңири мүмкүндүктөр ачыларына үмүттөнгөнүн айтты.

"Бирок азыркы учурга дейре алар өндүрүлгөн продукцияны ЕАЭБ өлкөлөрүнө чыгарууда тоскоолдуктарга туш болуп жатат. Биз дыйкандарыбызга ЕАЭБ мамлекеттерине продукциясын экспорттоого жол ачып берүү үчүн колдон келген аракетибизди жасашыбыз керек", — деди Жээнбеков.

Тараза көзөмөл пункту. Архив - Sputnik Кыргызстан
Жээнбеков: бардык өткөрмө бекеттердеги таразалар электрондошот
Премьер-министр тийиштүү министрлик жана ведомстволорго жергиликтүү картошканы казак рыногуна киргизүүгө карата салынган тыюуну алып салуу боюнча иштерди координациялоону тапшырды. Буга кошумча картошканы экспорттоого байланыштуу түзүлгөн абалды тез арада чечүү иретинде казак тарап менен сүйлөшүүлөрдү активдештирүүгө тапшырма берди.

Вице-премьер Олег Панкратов ЕАЭБ нормаларына ылайык, тыюу салуу үчүн олуттуу негиздемелер болуусу зарылдыгын, учурда бул маселе иликтенип жатканын айтты.

"Ыйгарым укуктуу органдар казак тарап менен консультацияларды жүргүзүүдө. Ата мекендик картошканы экспортоого карата тыюу салууну тез арада алып салуу үчүн бир катар чечимдер кабыл алынат", — деди Панкратов.

Казак тарап Евразиялык экономикалык биримдик тууралуу Келишимдин жоболоруна, ошондой эле Карантин жана өсүмдүктөрдү коргоо боюнча эл аралык конвенцияга таянуу менен 4-майдан тарта Кыргызстандан картошка алууга тыюу салган. 

Казакстандын Айыл чарба министрлигинин маалыматы боюнча үстүбүздөгү жылдын январь айынан баштап ууланган картошка киргизилген 79 учур катталган. Мындан улам Кыргызстанга жараксыз делген продукциянын 100дөн ашуун тоннасы кайтарылган. Андан сырткары, ууланган картошка айдоо иштери үчүн пайдаланылышы мүмкүн деген кооптуулук күчөгөн.

Жаңылыктар түрмөгү
0