БИШКЕК, 23-апр. — Sputnik. Туризмди өнүктүрүү фондунун кызмат адамдары бюджеттик каражатты максатсыз пайдаланган деп шектелүүдө. Башкы прокуратура мамлекетке 90 миллион сомдук зыян келтирилгенин билдирди.
Маалыматка ылайык, 2022-2024-жылдар аралыгында фонддун кызмат адамдары жеке менчик уюмдар менен туруктуу коррупциялык схема түзүп, кызмат көрсөтүү жана башка долбоорлорду ишке ашыруу боюнча жасалма келишимдерди түзүшкөн. Бирок аталган кызматтар жана долбоорлор иш жүзүндө аткарылган эмес.
Аталган факт боюнча кылмыш иши козголуп, тергөө уланууда.
Эске салсак, уставдык капиталы 1 миллиард сомду түзгөн "Туризмди өнүктүрүү фонду" ачык акционердик коому 2022-жылы мартта түптөлгөн. Максаты аймактарда туристтерди кабыл алуу үчүн инфраструктуранын абалын жакшыртуу, туризм тармагында көрсөтүлүүчү кызматтардын сапатын жогорулатуу жана өлкөгө келген туристтердин санын көбөйтүү экени айтылган.
Деген менен жыл айланбай фонддун ошол убактагы жетекчиси Елена Калашникова жана анын орун басары Александр Валитов каражатты максатсыз пайдаланууга шектелип УКМК тарабынан кармалган. Кийинчерээк Калашникова 12 миллион сом, Валитов 1,5 миллион сом мамлекетке төгүп берип үй камагына чыгарылганы айтылган. Бишкектин Биринчи май райондук соту аларга 150 миң сомдон айып салган.