БИШКЕК, 7-апр. — Sputnik. Чүй облусунун Аламүдүн райондук сотунун судьясы кармалды. Бул тууралуу УКМКнын маалымат кызматы билдирди.
Ага ылайык, Ш.Б.Ж. аттуу судья 26 миң доллар алып, эркинен ажыратпай турган чечим чыгарып берүүнү убадалаган. Бирок анын өтөсүнө чыга алган эмес. Судья мурда алынган акчанын 85 миң сомун кайтарып берип жаткан учурда колго түшкөн.
Шектүү УКМКнын тергөө абагына киргизилди. Учурда бул ишке тиешеси барлар аныкталууда.
Эске салсак, атайын кызмат 25-мартта ушул эле кылмыш ишинин алкагында Чүй облустук сотунун А.Ж.Б. аттуу улук катчысы да коррупцияга шектелип кармалганын маалымдаган. Тергөөнүн жүрүшүндө бул кылмышка дагы бир адамдын жана Аламүдүн сотунун судьясынын да тиешеси бар экени аныкталган.
Башкы прокурор Максат Асаналиев 27-мартта Судьялар кеңешинен Чүй облусунун Аламүдүн райондук сотунун судьясын Кылмыш-жаза кодексинин 209-беренесинин 3-бөлүгүнүн 1-пункту ("Ири өлчөмдөгү алдамчылык") боюнча кылмыш жоопкерчилигине тартууга макулдук берүүнү сураган. Судьялар кеңеши материалдарды карап чыгып, Башкы прокуратуранын сунуштамасын канааттандырып, сотту кылмыш жоопкерчилигине тартууга макулдук берүү жөнүндө чечим кабыл алган. Аталган судьяны ээлеген кызматынан убактылуу четтетүү тууралуу президент Садыр Жапаровго сунуш берилген.