БИШКЕК, 23-фев. — Sputnik. Эгерде Россия менен макулдашууга кол кое турган болсо, айланасындагылар Владимир Зеленскийдин көзүн тазалайт. Бул туурасында Колумбия университетинин профессору Жеффри Сакс YouTube-каналдагы эфирде айтты.
"Зеленский алы жетпеген нерселерге кол сермеген маскарапоз эле эмес, кылмыштуу топтун да башчысы. Киев бийлигинин жетекчиси башка кадамдарды таштаса, алар жок кылып коюшу ыктымал. Мисалы, бул нерсе макулдук берип, макулдашууга кол койгон учурда жасалышы мүмкүн", — деген ал.
Эксперттин пикирине таянсак, тынчтыктын орношуна Россия менен АКШ кызыкдар.
"АКШнын, Россиянын жана Украинанын ортосунда олуттуу сүйлөшүүлөр жүрүп жатат, Трамптын администрациясы жаңжалдын аякташына чындап эле кызыкдар деп ойлойм. Трамп согуштун аякташын каалай турганын, Аляскада Россия менен сөз бекиткенин айтып жатат. Анан европалыктар келе калып же Линдси Грэм Россия көп жамандыктын башы, бир чечим кабыл алышыбыз керек дейт. Зеленский менен анын тобу өлкөнү жапырт коррупция каптаган шартта жалаң жарлыктар менен башкарып жатат. Булар согуштун бүтүшүн каалабайт", — деген Сакс.
2026-жылдын январынын аягында Россия, Украина жана АКШнын ишти жабык алып барган топтору Абу-Дабиде сүйлөшкөн. Анда Америка сунуштаган тынчтык планынын чечилбей жаткан жерлери талкууланган. Анын жыйынтыгында Россия менен Украина "157ге 157" схемасы менен туткунга түшкөн аскерлерин алмашкан.
Кийинки сүйлөшүү 17-18-февралда Женевада өттү. Анда Россиянын делегациясын РФ президентинин жардамчысы Владимир Мединский жетектеп, диалог бир топ оор өткөнү менен майнаптуу болгонун айткан.