БИШКЕК, 21-янв. — Sputnik. Акыйкатчы институту адамдын укугун коргоодо маанилүү ролду аткаргандыктан мекемеге жыл сайын 10 миңге чейин арыз келип түшөт. Бул тууралуу акыйкатчы Жамиля Жаманбаева Sputnik Кыргызстан радиосунун эфиринде маек куруп жатып билдирди.
Анын айтымында, соңку жылдары Акыйкатчы институтунун бардык багыттар боюнча ишмердүүлүгү кыйла жакшырды.
"Жыл сайын Жогорку Кеңеште Акыйкатчы институту баяндама жасап, анын негизинде токтом кабыл алынат. Көрсөтүлгөн сунуштарды мамлекеттик органдар аткарууга милдеттүү. Акыркы баяндамада жалпы 98 сунуш берилген, анын ичинен 43ү токтомго киргизилген. Калган сунуштар мамлекеттик органдар тарабынан толук аткарылган. Натыйжада жалпы иштердин аткарылышы 68 пайызды түздү. Буга чейин бул көрсөткүч 20 пайызга да жетчү эмес. Муну менен бүгүнкү күндө биз тараптан берилген актыларга мамлекеттик органдар көңүл буруп жатат десем болот. Тактап айтканда, аларда Акыйкатчы институтунун милдеттерине карата түшүнүк пайда болуп, кайрылууларыбыз эске алынууда. Ошондой эле биз жөнүндө жарандардын да маалымдуулугу жогорулады. Жыл сайын Акыйкатчы институтуна 8 000-10 000 арыз түшүп, алардын ичинен үй-бүлөлүк зомбулукка байланышкан фактылар курч бойдон калууда. Кайрылуулардын басымдуу бөлүгү социалдык тармактар жана 111 кыска номери аркылуу түшөт", — деди Жаманбаева.
Ал белгилегендей, кайрылуулар түшкөн учурдан тартып тиешелүү кызматтар менен ыкчам байланыш түзүлүп, укуктарды коргоо чаралары көрүлөт. Жаманбаева 2025-жылы жүргүзүлгөн көзөмөлдүн алкагында адам укуктарынын бузулушуна байланыштуу 136 көңүл буруу актысы аныкталганын билдирди. Акыйкатчынын айтымында, эгерде актылардын жыйынтыгында адам укуктарынын бузулушуна жол берген кызматкерлер болсо, аларга эскертүүдөн баштап, кызматынан бошотууга чейинки жоопкерчилик чаралары колдонулат.
Ошондой эле ал мекеме аймактарда да мониторинг жүргүзүп, эл менен түз байланышта иш алып барып жатканын кошумчалады.