БИШКЕК, 22-дек. — Sputnik. ЕАЭБ өлкөлөрүнө тыштан катуу басым көрсөтүлүп жаткан шартта, биримдик өзүнүн ролун күчөттү. Ал эми ага мүчө мамлекеттердин экономикалык мүмкүнчүлүктөрү чыңдалды. Бул тууралуу Беларустун президенти Александр Лукашенко Санкт-Петербургдагы ЕАЭБ саммитинде билдирди.
“2020-2024-жылдары ЕАЭБдин экономикасы 11 пайызга, өнөр жайы 15 пайызга, айыл чарбасы 10 пайызга өстү. Эгерде биримдикте жумушсуздуктун деңгээли 2020-жылы дээрлик алтыпайызды түзсө, 2024-жылы үч пайызга жакын болду”, - деди ал.
Лукашенко белгилегендей, быйыл ЕАЭБдин негизги экономикалык көрсөткүчтөрү оң тенденцияны сактап турат. Бардык мүчө мамлекеттерде айлык акы өсүп, жумушсуздуктун эң төмөнкү деңгээли сакталууда. 2025-жылга карата евразиялык жана экономикалык интеграциянын жаңы этабы үчүн бекем негиз түзүлдү.
Беларусь президентинин дагы башка айткандарынан:
ЕАЭБдин өнөр жайлык мүмкүнчүлүгү толук кандуу пайдаланыла элек, негизги тармактарда жана технологиялык чөйрөлөрдө конкреттүү кызматташтык долбоорлорун ишке ашырууга даярбыз;
ЕАЭБ алкагында сунушталган финансылык колдоо куралына экономиканын реалдуу сектору тарабынан кызыгуу күч алууда;
Импорттон көз карандылыкты азайтуу үчүн айыл чарба тармагында чечкиндүү кадамдар керек;
ЕАЭБ өлкөлөрүнүн аграрчылары жарандарыбызды гана бакпастан, дүйнөлүк азык-түлүк рыногунда да олуттуу орун ала алышат;
ЕАЭБге караштуу байкоочу мамлекеттер менен өз ара кызматташуунун артыкчылыктуу багыттарынын бири болгон транспорттук-логистикалык потенциалды чыңдоо зарыл;
транспортту санариптештирүү, үзгүлтүксүз кыймылды түзүү жана ЕЭКтин аянтчасында тиешелүү чечимдерди иштеп чыгуу өзгөчө көзөмөлдө болушу керек;
санариптик чөйрө ЕАЭБ өлкөлөрүнүн экономикасынын атаандаштыкка жөндөмдүүлүгүнө олуттуу салым кошушу керек, бирок союздун ичинде кошумча тоскоолдуктарды жаратпашы зарыл;
жаңы өнөктөштөрдүн тизмесин түзүү милдети турат жана каалоочулар да көп;
Чек арадагы кезектерди жоюу, билим алууга тоскоолдуксуз мүмкүнчүлүк түзүү жана квалификация жөнүндөгү документтерди таануу, салттуу төлөм каражаттарын чектөөсүз колдонуу мүмкүнчүлүгү үчүн бизде дагы иштей турган нерселер бар.