БИШКЕК, 19-ноя. — Sputnik. Бишкектин 2050-жылга чейинки башкы планында реновация каралбаганын калаа мэри Айбек Жунушалиев билдирди.
Калаа башчысы Sputnik Кыргызстан агенттигинде өткөн брифингде сүйлөп жатып, реновация — бул жөн гана программа экенин, ал Курулуш министрлиги же Бишкек мэриясы тарабынан иштелип чыгып аткарыларын айткан.
"Биз бир аймакта реновация болот деп аныктайбыз. Бирок башкы планда "так ушул аймак, мынча убакытта реновация болот" деген нерсе жок. Документте жаңы үй курууда канча кабат болушу керектиги, талаптары тууралуу айтылган. Кийин реновация болсо курулуш кабыл алынган башкы планга жараша жүрөт", — деди Жунушалиев.
Мэрдин айтымында, башкы план келерки жылы бекитилиши керек. Анын долбоорун майда-чүйдөсүнө чейин Санкт-Петербургдун шаар куруу боюнча илим-изилдөө институту даярдап жатат.