Кыргыз ССРинин эл артисти Советбек Жумадылов менен СССРдин эл артисти Бакен Кыдыкеева. Алар элеттик жубайлардын ролун аткарган. Геннадий Базаровдун "Көчө" кинокартинасынан бир көрүнүш.
"Бакайдын жайытындагы" эки залкар — Муратбек Рыскулов менен Советбек Жумадылов
Баралына келип, таланты тапталган эки мыкты. СССРдин эл артисти Сүймөнкул Чокморов, КРдин эл артисти Жамал Сейдакматова Төлөмүш Океевдин "Улан" фильминде, Ысык-Көл, 1977-жыл.
Толгонай — жакындарын согуш жалмаган, бирок миң кайгыны былк этпей көтөргөн кайраттуу, ичтен сызганы менен каардуу да боло билген ЭНЕ. Геннадий Базаровдун "Саманчынын жолу" киносундагы актриса Бакен Кыдыкеева.
Кыргыз Республикасынын эл артисти Орозбек Кутманалиев "Бөрү зындан" фильминде. Бул тасма тууралуу кезегинде Советтер Союзунда бир топ талкуу, алкоо, мактоо болгон.
Сүймөнкул Чокморов режиссер Болот Шамшиевдин "Ысык-Көлдүн кызгалдактары" тасмасындагы башкы каарман Карабалтанын образында. Эмне деген керемет фильм!
СССРдин эл артисти Сабира Күмүшалиева режиссер Болот Шамшиевдин "Ак кеме" тасмасында Карыз таененин образында
Белгилүү актриса Жамал Сейдакматова менен актёр Дүйшөн Байдөбөтов. Режиссёр Дооронбек Садырбаевдин "Акбаранын көз жашы" тасмасына тартылып жаткан учур. Ош облусу, 1988-жыл.
Геннадий Базаровдун "Каныбек" фильми. Айдарбек датканын ролунда белгилүү актер Советбек Жумадылов.
Атактуу режиссер Мелис Убукеевдин "Манастын ааламы" киносунан ирмем. "Манас" менен кыргыздын дүйнөсүнө жетелеп кирип, ой-туюмду аңтарган фильмдердин бири.
Улуу манасчынын өмүрү менен өнөрүн баяндаган тасма "Саякбай" деп аталат. Режиссеру — Эрнест Абдыжапаров.
Акыркы жылдары тартылган дагы бир жакшы кинолордун бири Актын Арым Кубаттын "Кентавры" болду. Ал өз элинин улуттук баалуулуктарынын сакталып калышына жан үрөгөн адам тууралуу баяндайт.
Киночулар Бакыт Мукул менен Дастан Жапар уулу тарткан "Ата керээзи" жан дүйнөнү сапырып кеткен фильмдердин бири болду.