БИШКЕК, 17-окт. — Sputnik. Жер жүзүндө миллиондогон адам Russia Today телеканалын көрүп-угат. Бул тууралуу Россия президенти Владимир Путин айтканын РИА Новости жазды.
Алып баруучу Салам Мосафир менен маектешип жатып өлкө башчысы RT кызматкерлерин телеканалдын 20 жылдыгы менен куттуктаган. Путин калыпка түшүп калган дүйнөлүк маалымат каражаттарынын системасына кошулуу оңой эмес экенин белгилеп, RT "бир өзгөчө, өзүнүн жолун" тапканын кошумчалаган.
"Russia Today журналисттерине жасалган кысымга, тыюу, санкцияларга, административдик, финансылык чектөөлөргө карабай эмне ойлоп жатканын айтып жатты. Элге алынып кетүүнүн себеби, балким, ушундадыр", — деди Путин.
Russia Today телеканалы — Россиянын эл аралык маалыматтык телевизиондук компаниясы. RT брендинин алдында англис, испан, араб, немец, француз, серб тилдеринде сегиз канал жана эки документалдык канал эфирге чыгат. Башкы редактору — Маргарита Симоньян, башкы директору — Алексей Николов.
RT 2005-жылы 10-декабрда англис тилинде обого чыга баштайт. 2007-жылы араб каналы, 2009-жылы испан каналы ишке кирет. 2010-жылы RT America иштей баштаган. 2013-жылы телеканал Ruptly видеоагенттигин түзөт. 2014-жылы Лондондон RT UK иштеп, төрт жылдан кийин француз тилинде, 2021-жылы немец, 2024-жылы серб тилинде иштей баштаган. 2025-жылы Делиден RT India каналынын обого чыгышы күтүлүүдө.
Бул жылдардын аралыгында RT дүйнөлүк маалыматтык айдыңда эл аралык ЖМКлардын сап башына чыкты. 2011-жылы АКШнын ошол кездеги мамлекеттик катчысы Хилари Клинтон RT тууралуу айтып жатып: "Биз маалыматтык согушту башыбыздан кечирип, утулуудабыз", — деген. Анын бул сөзү көптөрдүн эсинде калды. RT дал ошондо Nielsen иликтөөсүнө ылайык, Американын ири беш шаарында эң популярдуу эл аралык маалыматтык телеканал деп табылган.
2012-жылы RT эфирине Wikileaks уюмунун негиздөөчүсү Жулиан Ассанждын берүүсү чыккан. Ал АКШнын ар кыл ведомстволорунун өлкөнүн кылмыштарын ачыктаган жашыруун маалыматтарын ачыктаганы менен белгилүү болгон. Ошол эле жылы легендалуу америкалык алып баруучу Ларри Кинг өз шоусу менен чыга баштаган.
2013-жылы RT маалыматтык каналдардын арасынан YouTube платформасын көргөндөрдүн саны боюнча лидер болот. 2014-жылы аудиториясы дүйнө жүзү боюнча 700 миллиондон ашып, 2015-жылы Facebook* тармагына катталуучуларынын саны боюнча рекорд койгон. 2020-жылы 10 миллиард көрүүчүсү менен RT маалыматтык телеканалдардан озуп чыккан.
Кийин да салынган санкцияларга карабай RT атаандаштарынан ат чабым алдыда болду. Буга RT менен расмий байланышы жок, бирок телеканалдын көзөмөлү менен иш жүргүзгөн "партизандык каналдар" жардам берди.
2024-жылы сентябрда АКШнын Мамдепартаменти "Украинанын көп мамлекеттер тарабынан тийиштүү деңгээлде колдоого алынбай жатышынын бирден-бир себеби — RT ишмердүүлүгүнүн кеңири масштабы. Пропаганда, туура эмес маалымат миллиарддарга жайылууда" деген билдирүү жасаган.
* Россияда ишмердүүлүгү экстремисттик деп таанылган Meta (Facebook жана Instagram соцтармагы) компаниясы