БИШКЕК, 9-окт. — Sputnik. Кыргызстандын энергетика министри Таалайбек Ибраев "Газпром" ишканасынын башкаруу комитетинин төрагасы Алексей Миллер менен жолугушту. Бул тууралуу министрликтен билдиришти.
Маалыматка караганда, алар 7-10-октябрь аралыгында Россиянын Санкт-Петербург шаарында өтүп жаткан XIV эл аралык газ форумунун алкагында жолугушкан. Тараптар Кыргызстанга газ жеткирүү, көгүлтүр от ташыган жана бөлүштүргөн тутумдун күз-кыш мезгилине даярдыгын талкуулашкан.
"Газпром" ишканасынын башкаруу комитетинин төрагасы Алексей Миллер
© Фото / пресс-служба минэнерго КР
"Министр калктуу конуштарды газдаштыруу үчүн жылдык каржылоонун суммасын кеминде 1,5 миллиард сомго көтөрүүнү, көгүлтүр оттун баасын өзгөртпөй сактап калуу мүмкүнчүлүгүн караштырууну сунуштады", — деп айтылат маалыматта.
Белгилей кетсек, Санкт-Петербургдагы форумда жаратылыш газынын дүйнөлүк рыногунун өнүгүү тенденциялары, ошондой эле өзгөрүп жаткан экономикалык жана геосаясий абалда эл аралык кызматташуунун келечеги талкууланууда.