БИШКЕК, 8-окт. — Sputnik. ИИМ Ак-Ордо-3 конушунда (Бишкек шаары) бир тууган эже-инини өлтүргөнгө шектелип жаткан улан көрсөтмө берген видеону жарыялады.
Андан шектүү С.И. милицияга ал үйгө акча үчүн киргенин, аталган жаңы конушка маршруттук такси менен барганын айтып жатканын көрүүгө болот. Ага чейин "Орто-Сай" базарынан эки бычак сатып алганын билдирген.
Маркумдун үйүнө бийик коргонунан ашып өтүү үчүн жердеги пескоблокторду алып узунунан тизип, ага чыгып, ашып кирген. Үйгө бутун чечип кирип, андан соң үйдүн кожоюнун башка урганын, андан кийин бычактаганын баяндаган. Экөө алышып жатып, эшик сынып кеткен. Үй ээси турууга аракет кылганда дагы бычак урган.
"Ошол учурда бир аял кирип келип мени колумдан тартты. Мен коркуп кетип аны ичке эки жолу, андан кийин артынан дагы бир жолу бычак урдум", — деген ал.
Шектүү үйдөн чыгып бычакты асынып жүргөн сумкасына салып койгонун жана андан кийин атайын тиркеме аркылуу такси чакырып кеткенин билдирген.
Эске салсак, 3-октябрда Ак-Ордо жаңы конушунда иниси менен эжеси киши колдуу болгон. Факт боюнча Кылмыш-жаза кодексинин 122-беренеси ("Адам өлтүрүү") менен иш козголгон. Андан кийин ИИМ шектүүнүн окуя болгон аймакта басып бараткан видеосун жарыялады. Көп узабай аялдын колуна бала көтөрүп, дагы эки чүрпөсүн ээрчитип, түнү жылаңайлак качып бараткан видеосу интернет желесине тараган.
Ал эми 7-октябрда кылмышка шектелип 19 жаштагы улан кармалды. Бүгүн, 8-октябрда, ИИМ шектүүнүн жүргөн жерлеринен жана окуя болгон үйдөн топтолгон видео, сүрөттөрдү таратты.
Ал эми маркумдун келинчеги милицияга окуянын кандай болгонун ыйлап айтып, көрсөтмө берген. Анда маркумдун жубайы үйүнө кирип, жакындарын бычактап кеткен уланды милиция көрсөткөн сүрөттөрдөн таанып жатканын айткан.