БИШКЕК, 5-окт. — Sputnik. Тбилисидеги башаламандыктар үчүн Евробиримдиктин элчиси жооптуу, анткени ЕБ өкүлдөрү өлкөдөгү нааразылык акцияларын колдошту. Бул тууралуу Грузиянын премьер-министри Ираклий Кобахидзе билдиргенин РИА Новости жазды.
"Чет өлкөдөн келген айрым адамдар, анын ичинде ЕБ өкүлү да конституциялык түзүлүштү кулатуу аракетине түз колдоо көрсөтүшкөн... Мындай шартта Грузиядагы Евробиримдиктин элчиси да бул үчүн өзгөчө жоопкерчиликтүү. Тбилисинин көчөлөрүндө болуп жаткандардын баарын чечкиндүү түрдө айыптагыла”, – деди премьер брифингде.
"Грузин кыялы" башкаруучу партиясынын башкы катчысы Каха Каладзе дагы Тбилисидеги митингге чыккандар сырттан башкарылган агенттиктин мүчөлөрү экенин жана алар жазаланарын билдирди.
Өлкөнүн Саламаттык сактоо министрлигинин маалыматы боюнча, Тбилисидеги башаламандыктардын натыйжасында акциянын 6 катышуучусу жана укук коргоо органдарынын 21 кызматкери жабыркаган. Бир полиция кызматкеринин абалы оор.
Тбилисиде жергиликтүү өз алдынча башкаруу органдарына шайлоо өтүп жаткан маалда нааразылык акциялары уюштурулду. Атап айтканда, митингге чыккандар Грузиянын президентинин резиденциясынын имаратын таш бараңга алышты.
Добуш берүүнүн жыйынтыгында өзүн-өзү башкаруучу Тбилиси, Кутаиси, Батуми, Рустави жана Поти шаарларынын мэрлери, 59 муниципалитеттин мэрлери жана жергиликтүү шаардык кеңештердин депутаттары шайланат. Тбилисинин мэрлик постуна тогуз талапкер ат салышты. Негизги атаандаштар: 2017-жылдан бери бул кызматты ээлеп келген башкаруучу "Грузин кыялы" партиясынан азыркы мэр Каха Каладзе жана оппозициялык "Лело - Күчтүү Грузия" жана "Гахария - Грузия үчүн" партияларынан бирдиктүү талапкер Ираклий Купрадзе.