БИШКЕК, 28-авг. — Sputnik. АКШ президенти Дональд Трамп миллиардер Жорж Соросту жана анын уулун кылмыш жоопкерчилигине тартууга чакырды. Бул тууралуу ал Truth Social социалдык түйүнүнө жазганын РИА Новости билдирди.
"Жорж Сорос жана анын солчул-радикал уулу зордукчул нааразычылык акцияларын колдогону үчүн RICO мыйзамынын алкагында айыпталышы керек. Сорос жана анын "кем акылдар" тобу биздин өлкөгө чоң зыян келтирди", — деп белгилеген ал.
Трамптын айтымында, "жиндилерге" Американы бөлүп-жарууга мындан ары жол берилбеши керек. Ал миллиардердин АКШнын батышындагы досторун этият болууга чакырып, өкмөт алардын ар бир кадамын байкап турганын эскертти.
Жорж Сорос — америкалык финансист жана инвестор. Анын ишмердүүлүгү каржылык чайкоочулугунан, чуулгандуу аброюнан улам ар кандай бааланып жүрөт. Соростун фонддору бир нече жолу айрым мамлекеттерде бийлик алмаштырууну уюштурган деп айыпталган. Финансист өзү 2004-жылы болгон Украинадагы революцияны жана 2013-жылы Евромайданды каржылаганын мойнуна алган. Айрым өлкөлөр аны ички иштерге кийлигишти деп айыпташат. Маалымат каражаттарында көбүнчө АКШнын Демократиялык партиясы менен байланышы бар экени айтылат.
Трампка каршы нааразылык акциялары
Ушул айдын ортосунда АКШ президенти Дональд Трамп Вашингтондогу кылмыштуулукка каршы чараларды жарыялады:
жергиликтүү полиция федералдык өкмөттүн түздөн-түз көзөмөлүнө өтөт;
борборго Улуттук гвардиянын аскерлери жөнөтүлдү;
зарылчылык жаралса Куралдуу күчтөрдү да жөнөтүүгө болот.
Пентагондун башчысы Пит Хегсеттин айтымында, улуттук гвардиячылар Вашингтонго жакынкы жумаларда келип, мамлекет башчысы канча убакыт талап кылса, баштан-аяк ошол жерде болушат.
Президенттин мындай кадамдарына жооп кылып, шаар тургундары байма-бай нааразычылык акцияларына чыгып жатышат.