БИШКЕК, 18-авг. — Sputnik. 18-22-август аралыгында Россиядан келген дарыгерлер медициналык окуу жайлардын студенттери үчүн мастер-класстарды өтүп, лекция окуйт, мындан тышкары, тегерек столдорго катышып, бейтаптарды кабыл алышат. Бул тууралуу Саламаттык сактоо министрлигинен билдиришти.
Анда Россиянын "РЖД-Медицина" клиникалар тармагынан келген алты жогорку квалификациялуу дарыгер иш алып барары айтылат. Медиктер Россотрудничество ишке ашырып жаткан эл аралык "Жакшылык Миссиясы" ыктыярдуу программасынын алкагында келишкен.
"Дарыгерлер Москва, Красноярск, Самара жана Чита шаарларынан келди. Алардын арасында уролог, жүрөк-кан тамыр хирургу, кардиолог, акушер-гинеколог, нефролог жана травматолог-ортопед бар", — деп айтылат маалыматта.
Ар бир дарыгер өзүнчө клиникалык базага бекитилгени кошумчаланды.