МЕККЕ, 4-июн. — Sputnik. Зыяратчылардын Мекке шаарындагы Масжид аль-Харам мечитине баруучу жолун ыңгайлуу жана коопсуз кылып жасоо пландалууда.
© Sputnik / Нурзат Усебаев
Бүгүн ыйык шаарда эл аралык журналисттерге Masar долбоорунун презентациясы жасалды. Документтин максаты — Масжид аль-Харам мечитине баруучу жолду зыяратчылар үчүн жакшыртып берүү. Презентацияны Umm Al Qura for Development & Construction мамлекеттик компаниясы өткөрдү. Журналисттерге жөө адамдар өтө турган коридордун аймагы, долбоордун архитектуралык жана санариптик моделдери көрсөтүлдү.
© Sputnik / Нурзат Усебаев
"Masar долбоору зыяратчылардын мечитке болгон сапарын коопсуз гана эмес, жогорку деңгээлде ыңгайлуу кылууга да багытталган", — деди компаниянын өкүлү.
Masar долбоору төмөнкүлөрдү камтыйт:
жөө адамдар өтө турган борбордук бульвардын узундугу 3,65 чакырымды түзөт. Бул жол шаардын батыш тарабындагы кире беришинен мечитти көздөй алып барат;
жаңы транспорттук инфраструктура, анын ичинде паркинг, коомдук транспорттор үчүн аялдамалар жана логистикалык борборлор камтылат;
эс алуучу жашыл аймактар жана бир нече тилдеги навигациялар болот;
1,2 миллион чарчы метрден ашык жерге мейманканалар жана коммерциялык курулуштар түшөт;
Биринчи фазаны 2026-жылга чейин бүтүрүп, 2030-жылга карата толук ишке киргизүү пландалууда.
Masar долбоору "Меккенин жаңы дарбазасы" деп аталып, Vision — 2030 демилгесинин негизги элементи болуп калмакчы.