БИШКЕК, 25-май — Sputnik. Россия өткөн жылдын жыйынтыгы менен соода профицити боюнча дүйнөдөгү үчүнчү өлкө болуп калды. Ал эми соодадан эң көп кирешени мурдагыдай эле Кытай тапканын РИА Новости улуттук статистика кызматтарына таянып жазды.
Басылма 91 өлкөнүн былтыркы соода боюнча маалыматтарын саресепке салган. Алардын арасынан 33 мамлекет гана 2,3 триллион долларга бааланган соода профицитине чыкканы, ошол эле учурда 58 өлкө 2,8 триллион доллар артка кеткени аныкталган.
2024-жылы Кытай 991 миллиард доллар профицитке чыкса, экинчи орунду Германия 258 миллиард доллар таза кирешеси менен ээлеген. Россия төрт орунга көтөрүлүп, 151 миллард доллар профицит менен үчүнчү орунга чыккан. Андан кийинки сапта Ирландия (98 миллиард доллар профицит) жана Нидерландия (89 миллиард доллар профицит) турат.
Ал эми эң чоң соода дефицити (1,3 триллион доллар) боюнча АКШ алдыга озуп чыккан. Андан кийинки саптарда 303 миллиард доллар дефицити менен Улуу Британия жана Индия (263 миллиард доллар) турат. Кирешеден артка кеткендердин катарын Франция (111 миллиард доллар) менен Түркия (82 миллиард доллар) толуктайт.