БИШКЕК, 2-май — Sputnik. Бишкекте чет элдиктер уюштурган онлайн-казинонун ишине бөгөт коюлду. Бул тууралуу ИИМдин маалымат кызматы кабарлады.
Билдирмеге караганда, Кылмыш иликтөө башкы башкармалыгынын кызматкерлери башка мамлекеттин жарандары Бишкектеги үйлөрдүн биринде алдамчылык менен алектенип жатканын аныкташкан.
"Ижарага алынган үйдө жашап, "Покер" онлайн-казиносун уюштурган чет өлкөнүн жарандары кармалды. Тинтүү учурунда алар жашаган жерден системалык блоктор, спутник антенналары, роутерлер алынган. Ошондой эле 23 мобилдик аппарат, ноутбук жана планшеттер табылган", — деп жазылат кабарда.
Учурда Кыргызстандын жарандарына келтирилген материалдык зыяндын көлөмү аныкталып жатканы кошумчаланды.