БИШКЕК, 17-мар. — Sputnik. Фергана өрөөнү кызматташтык менен достуктун жерине айланууда. Мындай пикири менен Sputnik маалымат борборунда өткөн видеокөпүрөдө РФ Илимдер академиясынын Примаков атындагы Дүйнөлүк экономика жана эл аралык мамилелер илим-изилдөө институтунун Борбор Азия секторунун башчысы Станислав Притчин бөлүштү.
Ал мамиленин жолго коюлушуна Кыргызстан менен Өзбекстандын учурдагы алакасы мисал боло аларын белгилеген. Эгер буга чейин Өзбекстандын жарандары анклавдарга келүүдө бир топ түйшүк тартса, азыр ички документтер менен жеңилдетилген режимде келип кете алат. Притчиндин айтымында, ушу тапта Фергана өрөөнүндө чек арага байланышкан олуттуу маселе жок, демек, бул тажрыйбаны жайылтуу кажет.
"Эми Кыргызстан менен Тажикстандын ортосундагы мамиле да ушундай өңүттө кетет деген ойдомун. Тажикстан менен Өзбекстан да чек арадан өтүүнү кыйла жеңилдетип жатат. Кызматташтыкты биргелешкен экономикалык, гуманитардык долбоорлор менен бекемдөө зарыл. Көптөн бери уланып келе жаткан катаал маселени оң жагына буруп кетүүгө азыр мыкты мүмкүнчүлүк түзүлдү, регионалдык экономикалык долбоорлор, транс чек аралык соода жана туризм мамлекеттердин өз ара кызматташуусунун негизи болуп бергидей абалга жетүү керек", — деди Притчин.
Эскперт Фергана өрөөнүндөгү мамлекеттер дайым татаал аймак катары кабылданып келгенин, эми абал өзгөрүп жатканын белгиледи.
"Фергана өрөөнү калктын жыштыгынан, ресурстун жетишсиздигинен, суу, жердин тартыштыгынан улам дайым талуу, кооптуу аймак катары каралып келген. Бул ресурстарга кызыгуу канча деген чыр-чатактарга себеп болуп келгени маалым. Эми боло турган саммит жана үч тараптуу кызматташуу форматы аркылуу таптакыр бөлөк көрүнүшкө — Фергана өрөөнүнүн кызматташтык менен достуктун жерине айланып жатканына күбө болобуз", — деди Притчин.
