БИШКЕК, 16-мар. — Sputnik. Украинанын ТИМ башчысы Андрей Сибига Япониянын NHK телеканалына берген маегинде Курск облусундагы аскердик операция уланарын айтканын РИА Новости жазды.
Маалыматка ылайык, бул аракеттер АКШ президенти Дональд Трамптын Россия лидери Владимир Путинге курчоодо калган украин жоокерлерине ырайым кылууну суранганына карабастан уланат.
"Башкы командачы (Украина Куралдуу күчтөрүнүн башчысы — ред.) Александр Сырский буга чейин билдиргендей, биз Курск облусундагы операцияларды улантуудабыз жана мындан ары да уланта беребиз", — деди Сибига.
Ал мындай операциялар ок атышууну 30 күнгө токтото турууда Москвага басым жасоого жана "тынчтыкты орнотууга багытталган сүйлөшүүлөрдө маанилүү фактор жана негизги элемент" деп эсептей турганын белгилеген.
Буга чейин Россиянын Генералдык штабынын башчысы Валерий Герасимов украиналык күчтөр Курск облусунда курчалганын, кээ бир багыттарда орус аскерлери мамлекеттик чек араны кесип өтүп, Сумск облусуна чыкканын билдирген.
15-мартта Дональд Трамп Владимир Путинден украин аскерлерине ырайым кылууну суранган. Путин Киев бийлиги жоокерлерине курал таштап багынып берүүгө буйрук бериши керектигин айтты. Владимир Зеленский болсо украин күчтөрү толук курчоодо калганын мойнуна алган жок.
