БИШКЕК, 4-мар. — Sputnik. Россия дагы беш айылдагы уулуу калдыктарды зыянсыздандырууну каржылайт. Бул тууралуу өзгөчө кырдаалдар министринин биринчи орун басары Азамат Мамбетов билдирди.
Анын айтымында, Кажы-Сай жана Миң-Куштагы уран калдыктары сакталган жайларды зыянсыздандыруу үчүн акча бөлүп, иштер дээрлик аяктаган.
Буга кошумча, Россия 2 миллиард 141 миллион рубль бөлүүгө макул болгон.
Төмөнкү калдык сактагычтар зыянсыздандырылат:
Ысык-Көл облусунун Кажы-Сай айылындагы штольня жана шахта калдык сактагычтар;
Ош облусунун Ноокат районуна караштуу Кара-Таш айылындагы калдык сактагыч;
Жалал-Абад облусунун Таш-Көмүр шаарынын Кызыл-Жар айылындагы үч калдык сактагыч;
Жалал-Абад облусунун Чаткал районунун Сумсар айылындагы үч уулуу калдык сактагыч;
Баткен облусуна караштуу Кадамжай районунун Кан айылындагы эки уулуу калдык сактагыч.
Министр бул объектилердин радиоактивдүүлүгү, чек арага жана корголуучу жаратылыш аймактарына жакындыгы эске алынып, тандап алынганын кошумчалады.