БИШКЕК, 10-янв. — Sputnik. Ала-Арча паркында тогуз ай бою иштеген лыжа базасы кайрадан жанданат. Бул тууралуу аталган парктын директорунун орун басары Кубанычбек Жекшенбеков "Биринчи радиого" билдирди.
Анын айтымында, совет маалынан калган парктын төрүндөгү лыжа базасы урап, жараксыз болуп калган. Объект жакын арада оңдолот.
Жекшенбеков ошондой эле 1-майдан тарта бул эс алуу жайына жеке автоунаалар киргизилбей турганын эске салды. Эми конокторду өткөрмө пунктунан парктын ичине чейин электр унаалары ташып турат.
"Электр унааларын Кытайдан сатып алабыз. Экологияны сакташ үчүн 1-майдан тарта ошолор менен гана жүрүп калабыз. Азыр заманбап өткөрмө пункту, 2 миң унаага ылайыкталган токтотуучу жай курулууда. Эми коноктор унаасын токтотуп, өткөрмө пунктуна чейин 150 метр жөө басып келип, андан ары электр унааларга отуруп кетишет. 4-5 аялдама курабыз, каалаган жеринен түшүп калса болот. Электр унаа акысыз, акча өткөрмө пунктуна эле төлөнөт", — деди ал.