Санариптештирүү саамалыгы элдин жашоосун жеңилдетүүгө эбегейсиз салым кошууда. Бул тууралуу Рахат Жусумамбетова Sputnik Кыргызстан радиосунун эфиринде https://sputnik.kg/Radio/ маек куруп жатып билдирди.
Анын айтымында, быйыл жарандар электрондук кызматтарды колдонуп, жолдо жүрүп, кезекке турбай 19 миллион саат убактысын үнөмдөгөн.
"Санариптик өнүктүрүү министрлиги быйыл көптөгөн орчундуу долбоорлорду ишке ашырды. Арасынан Tunduk тиркемесине токтолгум келип турат. Тиркеменин ичине элге керектүү көптөгөн мамлекеттик кызматтар ишке кирди. Быйыл эле Tunduk тиркемесинин алкагында 3 миллиарддан ашуун маалымат алмашуу жүрдү. Бул 3 миллиард кагаз документти жана жарандардын мамлекеттик органдардын ортосунда кагаз ташып, кезекте туруп корото турган убактысын үнөмдөгөн. Ошондой эле электрондук кызмат көрсөтүүлөр порталын дагы белгилегим келип турат. Аталган портал аркылуу жарандар 2024-жылы 14 миллионго жакын маалым каттарды алышкан. Биз атайын формула даярдап, ишке киргизгенбиз. Анын көрсөткүчтөрүнө таянсак, жарандар электрондук кызматтарды колдонуп жыл башынан бери 19 миллион саат убактысын жана бир миллиард сомун үнөмдөгөн", — деди Жусумамбетова.
Ошондой эле ал жарандар дагы документтерин текшерип, катачылыктарды кабарлап санариптешүүгө салым кошуп жатканын белгиледи.