БИШКЕК, 23-дек. — Sputnik. Садыр Жапаров электрондук товардык-транспорттук коштомо кагазды (ЭТТК) ири товарларга гана калтырууну карап көрүүнү тапшырды. Бул тууралуу президенттин маалымат катчысы Аскат Алагөзов билдирди.
Ага ылайык, мындай тапшырма министрлер кабинетинин төрагасы Адылбек Касымалиевге жана Салык кызматынын жетекчиси Алмамбет Шыкмаматовго берилген.
Аскат Алагөзов белгилегендей, мамлекет башчысында өлкө боюнча чоң-кичи базардагы, дүкөн-күркөлөрдөгү соода менен алектенгендердин ишмердүүлүгүндө жаралган көйгөйлөр боюнча толук маалымат бар.
Садыр Жапаров фискалдык саясатты элге кошумча жүк болбогудай, ошол эле учурда көмүскө экономиканын үлүшүн көбөйтпөй тургандай кылып иштеп чыгуунун максаттуулугун белгилеген.
Бүгүн Мамлекеттик салык кызматынын башчысы Алмамбет Шыкмаматов беш товардан башкасынан ЭТТКны алып салуу керектигин айтты. Ал эми министрлер кабинетинин башчысынын биринчи орун басары Данияр Амангелдиев ЭТТК жоюлбай турганын, бирок жөнөкөйлөштүрүлөрүн билдирген.