23-декабрдан тарта ЖОЖдорго кышкы кабыл алуу башталатТрамп Евробиримдикти кошумча тарифтер менен опузалады Кытай — Кыргызстан — Өзбекстан темир жолунун инвестициялык макулдашуусуна кол коюлдуАлдыда кененирээк20-декабрда Бишкектеги президенттин “Ынтымак-Ордо” администрациясында Кытай — Кыргызстан — Өзбекстан темир жолун куруу боюнча инвестициялык макулдашууга кол коюлду. Документ министрлер кабинети менен “Кытай — Кыргызстан — Өзбекстан темир жолу" компаниясынын ортосунда макулдашылганын өкмөттөн кабарлашты.Макулдашууга Кыргызстан тараптан Транспорт жана коммуникациялар министри Абсаттар Сыргабаев, ал эми инвестор тараптан – “Кытай – Кыргызстан – Өзбекстан” темир жолу компаниясы” ЖЧКсынын директорлор кеңешинин төрагасы Чжун Шэнгуй кол койгон. Министрлер кабинетинин төрагасынын орун басары, Суу ресурстары, айыл чарба жана кайра иштетүү өнөр жайы министри Бакыт Төрөбаев бүгүнкү кол коюу сүйлөшүүлөр процессинин узак жана татаал мезгилинен аймактык жана эл аралык мааниси терең масштабдагы инфраструктуралык долбоорду ишке ашыруунун практикалык планына өтүп жаткан кадам экенин белгилеген. Бул иш-чарага Кытайдын Кыргызстандагы убактылуу ишенимдүү өкүлү Ли Баоцзе жана Өзбекстандын Кыргызстандагы элчиси Саидикрам Иязходжаев баштаган делегация мүчөлөрү катышкан. Документте долбоорлоо, курулуш иштери, каржылоо, эксплутация жана техникалык иштер тууралуу тартиптер көрсөтүлгөн.
Абитуриенттер жогорку окуу жайларга ЖРТнын жыйынтыгы боюнча төрт этап менен кабыл алынат. Бул тууралуу Билим берүү жана илим министрлигинен билдиришти. Маалыматка ылайык, өнөктүк төмөнкү мөөнөттөрдө өтөт: биринчи тур 2024-жылдын 23-25-декабрында; экинчи тур 2025-жылдын 13-15-январында; үчүнчү тур 2025-жылдын 20-22-январында; төртүнчү тур 2025-жылдын 27-29-январында. Министрлик ЖОЖдорго кышкы кабыл алуу акы төлөнүүчү орундарга жүргүзүлөрүн белгиледи. Университеттердин жана кесиптердин тизмеси, катталуу жана жеке кабинети боюнча нускама министрликтин сайтына жайгаштырылган. Ошондой эле 2024-жылдагы ЖРТнын жыйынтыктары сынакка катышуу үчүн жарактуу экени айтылды. Окуу жайларга жылына эки жолу кабыл алуу механизми билим алууну жеткиликтүү кылуу максатында иштелип чыкканы кошумчаланды.
Дональд Трамп Евробиримдиктин өлкөлөрү Американын энергетикалык ресурстарын сатып ала баштабаса салык киргизем деп коркутту. Бул тууралуу АКШнын шайланган президенти Truth социалдык тармагына жазды. "Мен Евробиримдикке АКШ менен болгон мамиледеги чоң кемчилигин биздин мунай менен газды сатып алып толуктай турганын айттым. Болбосо туруктуу алым каралат", — деди АКШнын жаңы шайланган президенти. РИА Новости белгилегендей, Трамп биринчи президенттик мөөнөтүндө болот менен алюминийге жаңы салыктарды киргизген. 2022-жылдын соңунда АКШ инфляцияга каршы мыйзамды кабыл алгандан кийин европалык өнөктөштөрү менен дагы бир соода согушу башталган. Буга жооп катары Евробиримдик америкалык товарларга бажы төлөмдөрүн киргизген. Евробиримдик Трамп протекционисттик саясатка кайтып, Евробиримдиктен келген товарларга салыкты кайрадан жогорулатат деп кооптонууда. Буга чейин Кытайдын товарларынын тарифине 10 пайыз кошууну убада кылган.Мындан тышкары, кызматка киришкенден кийин, 20-январдан тарта, Мексика менен Канададан келген бардык товарларга 25 пайыздык тарифтерди киргизүү боюнча жарлыкка кол кое турганын билдирген.