БИШКЕК, 15-дек. — Sputnik. Араб өлкөлөрүнүн лидерлери Сирияда Башар Асаддын бийликтен четтетилишинен улам өз мамлекеттеринде толкундолордун тобокелчилигинен кооптонуп жатышат. Бул тууралуу Washington Post аналитиктерге, чиновниктерге жана дипломаттарга шилтеме берип жазганын РИА Новости кабарлады.
"Египеттин, Иорданиянын, Сауд Арабиянын жана БАЭнин лидерлери Асаддын кызматтан алынышы өздөрүнүн өлкөсүндө башаламандыктарды жаратышы мүмкүн деп тынчсызданып жатышат", — деп билдирген гезит.
Дипломаттардын бири Сирияда "Хайят Тахрир аль-Шам" тобунун таасиринин күчөшү Египеттин президенти Фаттах ас-Сисиге дагы коркунуч туудура турганын айткан.
Басылма араб өлкөлөрү Сириядагы окуяларга этияттык менен мамиле жасап, кырдаалга таасир этүү жолдорун табууга, ошондой эле Асад бийликтен кеткенден кийин туруктуулукту сактоого болор-болбосун түшүнүүгө аракет кылып жатышканын белгиледи.
2024-жылдын 8-декабрында Сириядагы кырдаал өзгөргөн, куралданган оппозициянын өкүлдөрү өлкөгө көзөмөл орноткондугун мамлекеттик телевидениеден жар салган. Премьер-министр Мухаммед Гази аль-Жаляли бир катар министрлер менен өлкөдө кала турганын, бирок коргоо министри кайда экени белгисиз болуп жатканын билдирген. Өкмөт башчы оппозициянын жетекчилиги менен байланыш түзө алганын айткан болчу.
Россия ТИМи Сирия президенти Башар Асад сирия жаңжалынын бир катар катышуучулары менен сүйлөшүп, бийликти тынчтык менен өткөрүп берүүнү тапшырып, кызматынан кетүү тууралуу чечим кабыл алганын маалымдаган. Сүйлөшүүлөргө Россия катышкан эмес. Жекшемби күнү Кремлден Асад үй-бүлө мүчөлөрү менен Москвага келгенин, Россия башпаанек бергенин айтышкан.
Агенттиктин маектеши РФ бийлиги Сириядагы куралдуу оппозициянын өкүлдөрү менен байланышта болуп турганын, лидерлер россиялык аскер база менен дипломатиялык мекмелердин коопсуздугуна кепилдик бергенин билдирген.
Учурда Сириянын убактылуу өкмөтүн Мухаммед аль-Башир жетектөөдө.