БИШКЕК, 14-дек. — Sputnik. Бүгүн Грузияда президенттик шайлоо өтөт. Бул кызматка бир гана Михаил Кавелашвилинин талапкерлиги катталганын Sputnik Ближнее зарубежье жазды.
Маалым болгондой, Кавелашвили буга чейинки парламенттик шайлоодо жеңген "Грузин кыялы" партиясынын өкүлү, парламенттин депутаты жана мурда футболист болчу.
Шайлоо бир аз башкача, жаңы система боюнча өтөт. Тагыраагы, Грузиянын тарыхында биринчи жолу шайлоо жалпы элдик добуш берүү жолу менен эмес, шайлоочулар коллегиясынын негизинде өткөрүлөт. Анын курамына парламенттин бардык 150 депутаты, Ажария менен Абхазиянын Жогорку кеңештеринин 41 депутаты жана муниципалдык кеңештерден 109 делегат кирет.
Шайлоочулар коллегиясынын кеминде 2/3 добушун алган талапкер биринчи турда шайланды деп эсептелет. Эгерде шайлоо өтпөй калса, 30 күндүн ичинде кайра болот.
Эске салсак, Грузиядагы парламенттик шайлоодо бийликтеги "Грузин кыялы" партиясы уткан. Президенттик мөөнөтү 16-декабрда аяктай турган Зурабишвили парламенттик да, президенттик да шайлоону тааныбай турганын билдирген.
Белгилей кетсек, Грузия парламенттик мамлекет. Президент анда өкүлчүлүк милдетти гана аткарат, чыныгы бийлик премьер-министрде.
Грузиянын президенти өкмөттүн макулдугу жок башка өлкөлөр жана эл аралык уюмдар менен сүйлөшүүлөрдү жүргүзө албайт. Келишимдерди түзүп, башка өлкөлөрдүн жана уюмдардын элчилеринин, дипломаттардын аккредитациясын кабыл албайт. Элчилерди жана коргоо күчтөрүнүн башчыларын кызматка коюп же иштен ала да албайт.
Парламенттик шайлоодон кийин аталган мамлекетте абал олку-солку болду. Зурабишвили баштаган оппозициялык күчтөр премьер-министр Ираклий Кобахидзе Грузиянын Евробиримдикке мүчөлүгү боюнча сүйлөшүүлөрдү 2028-жылга чейин токтотуу чечимин жарыялагандан кийин нааразычылык акцияларды уюштуруп, ал башаламандыкка алып келген.