БИШКЕК, 7-дек. — Sputnik. Президент Садыр Жапаров учактар абаны булгап, мөңгүлөрдүн ээришине таасир этип жатканын социалдык тармактагы баракчасына жазып, видео менен бөлүштү.
Мамлекет башчысы эл аралык иш-чараларда коомчулукту ар дайым мөңгүлөрдү сактоого чакырып келгенин белгилеп, Кореядан келе жатканда видеодогу көрүнүшкө туш болгонун жазган.
"Бул жаныбызда учуп бараткан самолеттен бөлүнүп чыккан керосиндин калдыктары. Капкара түтүн тоолордун чокуларына, мөңгүлөргө конууда. Ооба, биз бараткан учактан деле ушундай уулуу калдыктар тарап, мөңгүлөрдүн үстүнө түшүүдө. Муну менен климаттын өзгөрүүсүнө, дүйнө жүзү боюнча мөңгүлөрдүн кыскарышына бардыгы эле айтып келгендей завод, фабрика же эски автоунаалардан чыккан газ эле эмес, учактар да катуу таасир этерине көңүлүңөрдү бургум келет", — деп жазган Жапаров.
Ал суткасына 200 миңден ашык учак абага көтөрүлүп, ар бири тонналаган керосин сарптаарын жазган. Маселен, 2023-жылы дүйнө жүзү боюнча 312 миллион тонна, быйыл 335 миллион тонна авиакеросин сарпталганын мисал келтирди.
"Дүйнө жүзү боюнча согуштарга, кагылышытарга эмне деген эбегейсиз, сан жеткис суммадагы долларлар курал-жарактарга сарпталууда?! Ушул каражаттар учактар климатка терс таасир этпегидей кылууга жумшалса жакшы болмок", — деген Жапаров.