БИШКЕК, 3-дек. — Sputnik. Россия-Кыргыз өнүктүрүү фондунун он жылдыгына арналган иш-чарада эки өлкөнүн президенттеринин куттуктоолору окулду.
"Фонд бекем достугубуздун жана стратегиялык өнөктөштүгүбүздүн символу болуп калды. 2014-жылы РКӨФтүн түзүлүшү мамилелерди чыңдоодогу маанилүү кадам болгон", — деген Кыргызстандын президенти Садыр Жапаров.
Анын айтымында, РКӨФтү өлкөнүн экономикасын өнүктүрүүнүн катализатору десе болот. Россия лидери Владимир Путин кыргызстандык кесиптеши менен тилектештигин билдирген.
"2014-жылы фондду түзүү чечими эки өлкөнүн стратегиялык өнөктөштүгүн өнүктүрүүдө олуттуу кадам болду. Бүгүнкү ал финасылык-экономикалык институттардын арасында өзүнүн татыктуу ордун далилдеди. Учурда РКӨФ Кыргызстандын социалдык тармагынын бекемдешинин жана экономикалык өнүгүүсүнүн локомотиви болууда. Ошондой эле ЕАЭБ алкагында интеграциялык процесстерди илгерилетүүгө маанилүү салым кошууда", — деп белгилеген Путин.
Россия лидери РКӨФтүн жардамы менен ишкерлер 10 миң жумуш ордун түзгөнүн эске салган. Президент бул ишти улантып, өнөр жай, айыл чарба, туризм жана энергетика тармагында мүмкүнчүлүктү жогорулатууга көмөк көрсөтүү, ошондой эле россиялык инвесторлор менен биргелешкен ишмердүүлүктү түптөөгө жардам берүү маанилүү экенин баса белгиледи.