БИШКЕК, 1-дек. — Sputnik. Новопавловкада №145 автобус жолдун четинде турган кроссоверди аласалдыра сүздү. Бишкек мэриясынан билдиришкендей, окуя бүгүн болжол менен саат 09:20да болгон.
Видеодо көрүнүп тургандай, коомдук транспорт күү менен келип сүзгөндүктөн, жол четиндеги Honda CR-V аласалып кеткен. Муниципалитет жүргүнчүлөрдүн арасында жабыркагандар жок экенин белгилешти.
Ала арада мэрия автобустун ичинен тартылган кадрды жарыялап, кырсык анын айдоочусунун күнөөсүнөн улам болду деген алдын ала божомолун билдирди.
Муниципалитет айдоочулардын суранычы менен план толтуруудан бошотулганына, кырсыкты алдын алуу боюнча бир катар иш-аракеттер көрүлгөнүнө карабастан мындай окуялар болуп жатканын белгилеп, мамлекеттик мүлккө зыян келтиргендиги үчүн жоопкерчиликти күчөткөн мыйзам долбоорун иштеп чыгуу зарылдыгын кошумчалады.