БИШКЕК, 28-ноя. — Sputnik. Жогорку Кеңеште эксперименталдык түрмөлөрдү ачууга жол ачкан мыйзам долбоору үчүнчү окуудан кабыл алынды.
Анда өкмөттүн стратегиясында биринчи жолу соттолгондорду кармоо үчүн эксперименттик обочолонгон участок түзүү каралып, бирок ишке ашпай калганы белгиленген. Анткени жазык-аткаруу мыйзамдарында жаза өтөөнүн эксперименталдык режимдерин киргизүүнү караган ченемдер жок экени айтылган.
"Эксперименталдык режим деп эркиндигинен ажыратуунун башкача тартибин колдонууну түшүнүү зарыл. Ал түзөтүү мекемелери үчүн белгиленген режимдерге каршы келбейт. Мындан тышкары, ага кошумча каражат талап кылынбайт. Анткени иштеп жаткан түзөтүү мекемелеринде колдонулат. Ал эми кошумча финансылык чыгымдар зарыл болсо мамлекеттик ишканалар жана эл аралык уюмдар менен тиешелүү маселе иштелип чыгат", — деп жазылган анын негиздемесинде.
Мындан тышкары, соттолгон адамдын баласы жарым жетим болсо, аны менен жолугуу үчүн түрмөдөн убактылуу чыгууга уруксат берүү каралууда. Буга кошумча, билим алууну каалагандарга башка мекемеге которулууга мүмкүндүк берилери айтылган.
"Соттолгондор билим алууга укуктуу. Бирок түрмөнүн баарында мектеп каралган эмес, аларды каржылоого мамлекеттин мүмкүнчүлүгү жок. Анын үстүнө окууну каалаган соттолгондордун саны аз. Ушуга байланыштуу соттолгондорду билим алуу үчүн бир мекемеден экинчи мекемеге которууга шарт түзүлөт", — деп айтылат маалыматта.
Мындан тышкары, мыйзам долбоорунда соттолгондор үчүн эмгекке тартуу шарттарын түзүү менен аларга өз алдынча киреше табууга мүмкүнчүлүк берүү каралууда.