БИШКЕК, 27-ноя. — Sputnik. Бишкек мэриясы "Аккула" ат майданынын жерин өткөрүп берүү боюнча келишимге кол койду. Бул тууралуу муниципалитеттен билдиришти.
2024-жылдын 8-июлунда ROX Group жана TNG Global Foundation компаниялары ипподромдун мүлктүк комплексин сатып алуу сунушу менен мэрияга кайрылышкан. Бул эки компания жергиликтүү "РЦА Ливинг" ЖЧКсын негиздеген.
Келишимге ылайык, 53,5 гектар жер тилкесин 49 жылдык мөөнөткө пайдалануу үчүн берилет. Шаар бюджетине 5,8 миллиард сом төлөнөт. Ошондой эле 3,5 миллиард сомдук социалдык объектилерди, анын ичинде үч мектеп, үч бала бакча, сейил бак, жол, тротуар жана инженердик түйүндөрдү куруп, мэриянын карамагына өткөрүп берилет.
Жыйынтыгында шаар бюджетине жалпысынан 10 миллиард сомго чейин түшөрү пландалууда. Мындан тышкары, инвестор Бишкек шаарынын башкы планын иштеп чыгуу үчүн да каражат бөлөрү белгиленди.
Ипподромдун ордуна замандын талабына жооп берген турак жайлар, бизнес-борборлор, коомдук жана социалдык объектилер курулушу шарт.
Жалпы инвестициянын көлөмү 87 миллиард сомду түзөрү кошумчаланды.