БИШКЕК, 25-ноя. — Sputnik. АКШдагы иммигранттар бийликке келчү Дональд Трамп убадалаган жапырт депортацияга камынып жатышат. Бул тууралуу New York Times жазды.
Президенттик шайлоодо жеңишке жеткен Трамп мыйзамсыз мигранттарды массалык түрдө өлкөдөн чыгаруу программасын ишке ашырарын билдирген. Анда өзгөчө абал киргизүү жана аскердик ресурстарды пайдалануу каралган.
Басылманын жазганына караганда, мигранттар юристтер менен байланышып, бейөкмөт уюмдардын миграция маселеси көтөрүлгөн бардык жолугушууларына катышып жатышат. Адамдар Трамп убада кылган программадан коргонуу үчүн болгон аракетин көрүүдө.
"Грин-картасы барлар эртерээк АКШнын жараны болууга жан үрөп жатышат. Статусу так эмес же өлкөгө мыйзамсыз киргендер баш паанек алуу боюнча арыздарды калтырышууда, кароодо турган документ депортациядан алып кала алат", — деп айтылат макалада.
Гезиттин маалыматы боюнча, АКШнын жарандары менен мамилеси барлар эртерээк үйлөнүп, турмушка чыгууга аракет кылышууда, бул аларга грин-карта алуу үчүн арыз таштоого жол ачат.
Буга чейин NBC News Трамптын мыйзамсыз мигранттарды өлкөдөн жапырт чыгаруу боюнча программасы ишке ашып калса АКШдагы төрт миллиондон ашуун үй-бүлө мүчөлөрү эки жакта каларын билдирген эле.
Массалык депортация Трамптын шайлоо кампаниясынын негизги убадаларынын бири болгон. Президенттигинин биринчи мөөнөтүндө да ал Пентагондун каражатын Мексика менен чектешкен жерге дубал тургузууга жумшоо үчүн өзгөчө абал режимин киргизгени маалым.