БИШКЕК, 30-окт. — Sputnik. АКШ менен Европа биримдиги Грузияда өткөн парламенттик шайлоого таасир этүү үчүн бардыгын жасады, бирок өлкө эли мындай басымдарга карабастан өз тандоосун жасады. Бул тууралуу РФ ТИМинин расмий өкүлү Мария Захарова билдиргенин РИА Новости жазды.
"Бир нече ай бою Вашингтон менен Брюссель грузиялык шайлоочуларга таасир этүү үчүн колунан келгенинин баарын кылды, ошол эле учурда мунун баарын ачык эле жасап жатышты", — деген Захарова брифингде.
Ал мындай жыйынтыктар Грузия жана анын жарандары өздөрүнүн көз карандысыз, эгемендүү мамлекетинин ички иштерине тышкы таасирлерди чектөө чечимин кабыл алгандыгынан улам келгенин белгилеген.
"Катуу басымдарга карабастан грузин эли депутаттарды шайлай алышты. 26-октябрда шайлоочулар Грузиядагы туруктуулукту, анын өнүгүшүн жана өлкөнүн салттуу баалуулуктарын жакташарын билдиришти. Антпесе анын альтернативасы башаламандык, диний чыңалуулар болушу мүмкүн экендигин алар жакшы түшүнүштү", —деп кошумчалаган Захарова.
Грузияда парламенттик шайлоо 26-октябрда өттү. Өлкөнүн Борбордук шайлоо комиссиясы РФ менен мамилени сактоону жактаган жана Россияга каршы чектөөлөргө каршы чыккан "Грузин кыялы" 53,93 пайыз добушка ээ болгонун жарыялаган. Мындан тышкары, парламентке 37,78 пайыз добуш алып дагы төрт оппозициялык партия өткөн. Оппозиция өкүлдөрү БШКнын бул жыйынтыктарын тааныбай турганын билдиришкен.
Европа коопсуздук жана кызматташтык уюмунун кыска мөөнөттүү миссиясынын атайын координатору Паскаль Ализар Грузияда шайлоо жакшы уюштурулгандыгын, ошол эле учурда байкоочулар тарабынан эреже бузуулар да табылганын белгилеген.
Европанын оппозициясына көмөк көрсөткөн Грузия президенти Саломе Зурабишвили Баш мыйзам боюнча президент партиядан тыш болушу керектиги жазылгандыгына карабастан шайлоонун жыйынтыгы чыккандан кийин ага каршы чыгууга чакырык жасаган.