БИШКЕК, 30-окт. — Sputnik. Казанда өткөн БРИКС саммитинин жыйынтыгы Батыштын Россияны эл аралык аренада обочолонтуу аракети максатына жетпегенин көрсөттү. Бул тууралуу РФ ТИМинин жетекчиси Сергей Лавров билдиргенин РИА Новости жазды.
Министр Чет жакта жашаган россиялык мекендештердин дүйнөлүк конгрессинин ачылышында сүйлөгөн. Иш-чара быйыл сегизинчи ирет өтүп жатат.
"Россияны эл аралык аренада обочолонтуу аракетинен майнап чыккан жок. Дүйнөлүк көпчүлүк Батыштын айтканы менен болбой, биз менен ар тармакта байланышын бекемдеп жатат. Буга Россиянын төрагалыгы менен Казанда өткөн БРИКС саммити далил", — деди Лавров.
Дипломаттын айтымында, акыркы үч жыл ичинде абал кескин өзгөрүп кеткен жок.
"АКШ башында турган жамааттык Батыш Россияга салган санкциясын он эселеп күчөтүп, бизге толук кандуу гибриддик агрессиясын баштады", — деди ал.
Бирок министр бул аракеттин бири да өтөсүнө чыкпай турганын белгилеген.
"Атайын аскердик операция президент Путин койгон максаттарынын баарына жетет. Россиянын коопсуздугу, калктын, мекендештерибиздин ар-намысы, ата-бабалардын жеринде жашоо, эне тилинде сүйлөө, өз тарыхын, баалуулугун сактоо укугу ишенимдүү корголот", — деди Лавров.
Белгилей кетсек, БРИКС саммити 22-24-октябрь күндөрү Казань шаарында өткөн.