Кыргызстанда биринчи жолу стратегиялык маанидеги жолдор ата мекендик компаниялар тарабынан курулууда. Президент Садыр Жапаров бул тууралуу автомобиль транспорту жана жол чарба кызматкерлерин бүгүнкү майрамы менен куттуктап жатып белгиледи. "85 жылдык тарыхы бар автомобиль транспорту жана жол тармагынын өлкөнү өнүктүрүүдө мааниси эбегейсиз. Жолдордун абалы бул мамлекеттин өнүгүүсүнүн негизги көрсөткүчтөрүнүн бири болуп эсептелет. Биз сиздердей кесипкөй адистерибиз турганда өз жолубузду өзүбүз куруп, өлкөбүздү өнүктүрүүгө өз алдынча бет алып кетерибизге толук ишеним бар", — деди президент. Ошондой эле Бүгүнкү күндө алгачкы жолу стратегиялык маанидеги ири долбоорлор ата мекендик куруучулар тарабынан ишке ашырылып жатканы кубандырарын белгиледи. Муну менен катар президент Транспорт жана жол чарбасынын кызматкерлерине ыраазычылык билдирип, кажыбас кайрат, дем-күч жана бакубат турмуш каалады.
Ирандын аскердик инфраструктурасына жасалган бир катар аба соккуларынан каза болгондордун жана жабыркагандардын арасында Кыргызстандын жарандары жок. Бул тууралуу Тышкы иштер министрлигинен билдиришти. Мекемден белгилешкендей, Кыргызстандын Ирандагы элчилиги өлкөдө жүргөн кыргыз жарандары менен туруктуу байланышта. Муну менен катар элчилик аларды өздүк коопсуздуктун максималдуу чараларын камсыз кылууга чакырат. Маалыматта ошондой эле Элчиликтин жана ТИМ консулдук департаментинин ыкчам байланыш телефону иштеп жатканы айтылат.
Министрлер кабинетинин төрагасынын биринчи орун басары Адылбек Касымалиев Дүйнөлүк банктын вице-президенти Антонелла Бассани менен сүйлөштү. Бул тууралуу өкмөттүн маалымат кызматы кабарлады. Алар Дүйнөлүк банк тобунун жана Эл аралык валюта фондунун башкаруучуларынын жылдык жолугушуусунда кезиккен. Талкуунун негизги темаларынын бири Камбар-Ата-1 ГЭСин курууну ишке ашыруу болгон. Касымалиев долбоор Борбор Азия үчүн стратегиялык мааниге ээ экенин белгилеген. Антонелла Бассани Камбар-Ата-1 ГЭСин куруу долбоорун колдой турганын билдирип, долбоор дүйнөлүк коомчулуктун кызыгуусун арттырып жатканын белгилеген. Ошондой эле долбоор экономикалык реформалар үчүн мүмкүнчүлүктөрдү түзүп, улуттук экономиканын бардык тармактарына таасирин тийгизе турганын айткан.
Өзбекстан парламентинин мыйзам чыгаруу палатасына добуш берүү үчүн шайлоо участкалары ачылды. Алар саат 08:00дөн 20:00гө чейин иштээрин Sputnik Өзбекстан жазды. Маалым болгондой, Өзбекстандын парламенти эки палатадан турат. Депутаттар беш жылдык мөөнөткө быйыл биринчи жолу аралаш мажоритардык-пропорционалдык моделди колдонуу менен шайланат. Маселен, төмөнкү палатадагы 150 орунга 75 депутат бир мандаттуу округ боюнча, калган 75и саясий партияларга берилген добуштардын негизинде бирдиктүү шайлоо округу боюнча келмекчи. Бүгүн шайлоого Өзбекстандын либералдык-демократиялык партиясы, Элдик-демократиялык партиясы, "Улуттук кайра жаралуу", "Адилет" социал-демократиялык жана Экологиялык партиясы катышып жатканы белгиленди.