БИШКЕК, 20-окт. — Sputnik. Мындан ары Украинанын НАТОнун курамына киришине АКШнын принципиалдуу каршылыгы жок. Бул тууралуу Le Monde басылмасы Епропанын дипломатиясындагы булактарына таянып билдиргенин РИА Новости жазды.
"Буга чейин АКШ менен Германия НАТОнун Украинаны курамына кошуу менен кеңейишине бөгөт коюп келген, ошол эле учурда Франция менен Улуу Британия Украинанын ага киришин колдочу. Бирок айрым маалыматтарга караганда, эми Америка буга каршы эмес", — деп айтылат маалыматта.
Жеке булактардын пикиринде, Вашингтондун позициясынын өзгөрүшү бул маселеге карата Берлиндин да көз карашына таасир этиши мүмкүн.
Маалыматта эгерде АКШдагы президенттик шайлоодо Камала Харрис жеңип чыкса Жозеф Байден анын ант берүү аземине чейин тиешелүү чечимдерди кабыл алышы мүмкүн экендиги белгиленет. Бирок шайлоодо жеңишке Дональд Трамп жете турган болсо, анда мындай демилге кооптуу болуп калат.
Зеленский шаршембиде Украинанын парламентине "жеңиш планын" айтып берген. Документ беш пунктудан жана купуялуу үч бөлүктөн турат. Тактап айтканда, биринчи пунктуда Украинаны НАТОго киргизүү жана андан ары мүчө кылуу каралган, экинчи пунктуда Россиянын аймактарына ыраакка аткан куралдар менен сокку урууга чектөөнүн алынышы жазылган. Үчүнчү пунктуда Украинага Россияны "өзөктүк эмес куралдардан токтотуп турган топтомдорду" жайгаштыруу жазылган. Зеленский бул пландарды ишке ашыруу өнөктөштөрдөн көз каранды экенин белгилеген.
Россия ТИМинин расмий өкүлү Мария Захарова Зеленскийдин "жеңиш планы" тууралуу пикирин билдирип, "бул план эмес, бири-бирине байланышпаган ураандардын топтому" деп айткан. Захарова бул пландар НАТОну Россия менен согушууга түздөн-түз түртөт деген оюн кошумчалаган.
Россия президенти Владимир Путин Украина НАТОго мүчө болсо Россиянын коопсуздугуна коркунуч жараларын, буга чейинки ушундай коопсуздук коркунучу атайын аскердик операциялардын башталышына себеп болгонун айтып келет.