БИШКЕК, 11-окт. — Sputnik. Дүйнө жаңы кыйынчылыктарга туш болгон доордо жашап жатабыз. Климаттын өзгөрүшү болобу, ааламдашуу же технологиялык революция болобу, баарына туруштук берүүгө даяр турушубуз керек. Дал ушундай учурда биз өткөндүн сабактарына, өнүгүү жолун көрсөткөн улуу ойчулдарга кайрылуу зарыл. Бул тууралуу президент Садыр Жапаров Ашхабаддагы форумда айтканын маалымат кызматы кабарлады.
Эскерте кетсек, учурда аталган шаарда улуу түркмөн акыны жана ойчулу Махтумкули Фрагинин 300 жылдык мааракесине арналган "Мезгил менен цивилизациялардын өз ара байланышы — тынчтыктын жана өнүгүүнүн негизи" аттуу эл аралык форум өтүп жатат.
Президент сөзүн Чыңгыз Айтматовдун Махтумкули Фрагинин чыгармачылыгы жөнүндө айткан сөзү менен баштап, түркмөн элине кыргыз жазуучусуна эстелик тургузгандыгына ыраазычылык билдирди.
"Азыр биз дүйнө жаңы кыйынчылыктарга туш болгон доордо жашап жатабыз. Климаттын өзгөрүшү болобу, ааламдашуу же технологиялык революция болобу, баарына туруштук берүүгө даяр турушубуз керек. Дал ушундай учурда биз өткөндүн сабактарына, өнүгүү жолун көрсөткөн улуу ойчулдарга кайрылууга тийишпиз. Орток бабабыз Махтумкули Фрагинин калтырган мурасы сабырдуулукту, өз ара урматтоону жана жалпы ынтымак үчүн кызматташууну ар дайым эскертип турат", — деди Жапаров.
Президент Махтумкули Фрагинин 300 жылдыгы жөн гана маараке эмес, бул келечек муундардын алдындагы жалпы жоопкерчиликти эскерте турган иш-чара экенин белгилеген. Анын айтымында, бул тынчтыкты сактоо, ар бир элдин каада-салтын урматтоо, өз ара түшүнүшүү сапаттарына негизделген коом түзүүдө башкы жоопкерчилик болуп саналат.
Жапаров маданият элдин башын бириктирип гана тим болбостон, жаңы жетишкендиктерге да шыктандырарына, өз ара урмат-сый жана ишеним көрсөтүүнүн негизинде түшүнүшүүгө, кыйынчылыктарды жоюуга жана бекем байланыштарды түзүүгө жардам берерине токтолгон.