Иш-чарага окуу жайдын ректору Догдурбек Чонтоев, РФтин Свердлов облусунун билим берүү жана жаштар саясаты министринин орун басары Ирина Серкова, Россиянын Кыргызстандагы элчилигинин кеңешчиси Сергей Храмов, ошондой эле Свердлов облусунун мыйзам чыгаруу жыйынынын депутаттары катышты.
Чонтоев белгилегендей, медиаборбор профессордук-окутуучулар курамы, магистранттар жана студенттер Россия жана орус маданияты тууралуу кошумча маалымат ала турган аянтчага айланат. Ал бул борбор журналистика тармагындагы билим берүү жана кадрларды даярдоо системасында өзүнүн татыктуу ордун ээлей турганын кошумчалады.
"Борбор студенттерибиздин руханий жактан байып, интеллектуалдык жактан өсүп, ой жүгүртүүсүн кеңейтүүгө жардам берет деп ишенем. Бул коомдук аң-сезимди калыптандыруучу, өлкөнүн маалыматтык саясатын жүргүзгөн, кыргыз-орус мамилелеринин түптөлүшүнө жана чыңдалышына салым кошо турган келечектеги журналисттер үчүн абдан маанилүү", — деди Чонтоев.
Элчиликтин кеңешчиси Сергей Крамов студенттерге медиаборбордон ала турган билим эч качан ашыкча болбой турганын айтты.
"Мен өзүм коммуникация тармагында билим алгам, адистигим журналист. PR тармагында жана саясий партиянын маалымат кызматында иштөөгө мүмкүнчүлүк болду, андан кийин эл аралык чөйрөдө иштедим. Журналисттик билим универсалдуу, ал сөзсүз түрдө пайдалуу болот. Окуучулар эң алдыңкы билимди "Россия" медиаборборунан алышат деп ишенем", — деди Крамов.
Долбоордун автору, КУУнун Журналистика жана коммуникациялар институтунун директору Ширин Костюк белгилегендей, 2023-жылы медиаборбор түзүү идеясы университеттин чоң окумуштуулар кеңешинин мүчөлөрү тарабынан колдоого алынган.
"Медиаборбор түзүү идеясын россиялык "Георгий Победоносец" коомдук фонду колдогон. Алар борборду техникалык жактан жабдууга демөөрчүлүк кылышкан. Тактап айтканда, эмеректерди, оргтехникаларды жана китептерди сатып алууга жардам беришти. Биз келечектеги журналисттерди тарбиялайбыз, демек, бүгүнкү студент — эртеңки практик журналист. Бул адамдар 7 миллион калктын пикир жаратуучулары болот. Бул борбордо балдар орус маданияты, классикалык адабияты менен таанышып, кыргыз-орус мамилесин чыңдоого өз салымын кошушун каалайбыз", — деди Костюк.