БИШКЕК, 28-сен. — Sputnik. Өлкө башчы Садыр Жапаров ЖМК жана интернет аркылуу жалаа жабуу, мазактоого айып салган мыйзам долбоору боюнча "Кабар" агенттигине маек курду.
Буга чейин Маданият министрлиги ЖМК менен интернетте жалаа жабуу, мазактоого жеке жактарга 100 миң сом, юридикалык жактарга 200 миң сом айып салууну сунуштап, мыйзам долбоорун Жогорку Кеңешке киргизген.
Президент туура эмес маалымат тараткандарга мындай өлчөмдө (100, 200 миң) айып салууга каршы экенин айтып, бирок бул мыйзам керек экенин белгилеген.
Өлкө башчынын мыйзам долбоору боюнча "Кабар" агенттигиндеги маегинен урунттуу учурлар:
бул мыйзамды Маданият министрлиги сунуштаган экен. Мен кечээ соцтармакта талкуу болуп жаткандан кийин билдим. Менин оюмча, аны кайра чакыртып алыштын кереги жок. Анткени бул азырынча долбоор гана. Депутаттар, ЖМКлар сунуштарын айтып, алымча-кошумча кылышсын. Мен дагы 100 миң, 200 миң айып салуу дегенге каршымын. Муну парламенттин кароосуна коюш керек. Канча айып пул салыш керектигин депутаттар чечет;
бул элди дүрбөлөңгө салган маалыматтарды таратып жаткандар үчүн демилгеленген мыйзам болсо керек. Парламентке жетип талкуу башталсынчы, анан көрөлү;
Кыргызстанда сөз эркиндиги бар, болуп келген жана мындан ары да боло берет. Соцтармакка жалган маалымат таратпа, бирөө-жарымды далили жок каралаба, абийирине шек келтирбе. Суроо-талабың болобу, сын, пикириң болобу, бийликтин кемчиликтери болобу, каалаган жерде далил менен сайрай бер. Кемчиликтерибизди оңдойбуз, суроо-талаптарыңарды колдон келишинче чечебиз;
эл менен да, ЖМКлар менен да эриш-аркак иштешкенге даярбыз жана ачыкпыз. Жалган жана элди дүрбөлөңгө чакырган маалыматтар сөз эркиндигине жатпайт.