БИШКЕК, 20-сен. — Sputnik. Миң-Куштагы "Туюк-Суу" уран калдыктары сакталган жайды зыянсыздандыруу иштери быйыл бүткөрүлөт. Бул тууралуу "Росатом" корпорациясынын сайтында кабарланган.
Маалыматка ылайык, Миң-Кушта "Дальнее" калдык сактоочу жайын консервациялоо, ал эми "Туюк-Сууну" толугу менен жоюу иштери жүрүүдө.
"Бул — эң татаал долбоорлордун бири. Анткени көчкү коркунучунан улам уулуу калдыктардын айлана-чөйрөгө тарап кетүү ыктымалдуулугу бар эле. Эми мындай коркунуч жок", — деген корпорациянын өкүлү Василий Тинин.
Ошондой эле "Росатом" 2025-жылы Ысык-Көл облусунун Кажы-Сай айылындагы уулуу калдыктар сакталган жайдагы иштерди улантат. Бул жерде 2019-жылы консервациялоо иштери жыйынтыкталганы белгиленди.
Мындан тышкары, компания Ош облусунун Ноокат районунда, Жалал-Абаддын Кызыл-Жар айылында дагы тиешелүү иштерди баштаары айтылды. Мунун баары Россиянын эсебинен жүргүзүлүп ишке ашырылып жатканы кошумчаланды.
Эске салсак, өлкөдөгү уулуу калдыктар сакталган жайларды зыянсыздандыруу иштерин "Росатом" компаниясы жүргүзүп келет.