БИШКЕК, 19-сен. — Sputnik. "Коопсуз шаар" системасы өлкөнүн бардык аймагына киргизилет. Бул тууралуу ИИМ башчысы Улан Ниязбеков билдирди.
Ал 19-сентябрда ички иштер органдарынын жетекчилерине онлайн-кеңешме өткөргөн. Ал кечээ президент "Коопсуз шаар" тутумун Ички иштер министрлигинин карамагына толугу менен өткөрүп берүү жөнүндө" жарлыкка кол койгонун эске салды.
"Жарлыктын негизинде республиканын бардык аймактарына "Коопсуз шаар" тутумун жайылтып, элибиздин туруктуу коопсуздугун жогорку деңгээлде камсыздоо милдетин так аткарышыбыз керек. Бүгүндөн баштап Санариптик өнүктүрүү министрлигинен "Коопсуз шаар" тутумун өткөрүп алуу жумуштарын баштайбыз. Бардык жумуштар аяктагандан кийин аны республиканын бардык аймактарына жайылтуу процессине өтөбүз", — деди ИИМ башчысы.
Ошондой эле ал системаны иштетүү үчүн тиешелүү даярдыктарды көрүүнү жер-жерлердеги ички иштер башкармалыктарынын жана бөлүмдөрүнүн жетекчилерине тапшырды.