БИШКЕК, 17-сен. — Sputnik. Meta* компаниясы RT телеканалы менен "Россия сегодня" медиатобунун платформаларындагы тиркемелерин чектеген кадамын таштады. Бул туурасында РИА Новости NBC News телеканалына таянып билдирди.
"Тыкыр жасалган анализдерден кийин Россиянын мамлекеттик ЖМКларына каршы жасалган кадамдарыбызды кеңейтүүнү чечтик. Аталган түзүмгө кирген RT телеканалы менен "Россия сегодня" медиатобу чет элдик болуп туруп киришкени үчүн биздин тиркемелерде блоктолду", — деп айтылган алардын маалыматында.
Эске салсак, АКШнын Финансы министрлиги 4-сентябрда "Россия сегодня" медиатобуна, РИА Новости, Sputnik, Ruptly, RT телеканалына каршы мамилесин катаалданткан.
"Россия сегодня" медиатобу менен RT телеканалынын башкы редактору Маргарита Симоньян, анын орун басарлары Антон Анисимов жана Елизавета Бродскаяга санкция салынган. Алардан сырткары, бул тизменин ичинде RT телеканалынын маалыматтык бөлүмүнүн башчысы Андрей Кияшко, санариптик долбоорлор бөлүмүнүн жетекчиси Константин Калашников жана бир катар кызматкерлер бар. Калашников менен RT кызматкери Елена Афанасьевага арам акчаларды адалдоо максатында бир кепке келип алышкан жана чет элдик агенттерди каттоо жөнүндөгү мыйзамды бузган деген айыптар тагылган.
АКШнын Мамлекеттик департаменти "Россия сегодня" медиатобун жана анын Америкадагы туунду компанияларына "чет элдик миссия" макамын тагып, ишин чектеген. Америка мыйзамы эми мекемеден АКШда иштеген кызматкерлер жана алардын мүлкү тууралуу да маалымат берүүнү талап кылууда.
Муну менен катар эле АКШ бийлиги "Кремль колдойт" делген ЖМКларда иштеген адамдарга виза берүүнү чектөө тууралуу жаңы саясатын да жарыялады. Мамдепартамент бул жагдай кимдерге тиешелүү экенин тактоодон баш тарткан. Мекеменин расмий өкүлүнүн айтымында, чектөө Россиянын айрым журналисттерине эмес, чектөөгө кабылган уюмдардын кызматкерлерине тиешелүү.
Россия президентинин маалымат катчысы Дмитрий Песков РИА Новости агенттигине "Россия сегодня" медиатобуна каршы санкцияга жооп АКШнын Россиядагы ЖМКларынын маалымат жайылтуусуна чектөө киргизүү менен болорун билдирген. Ошол эле учурда ал Америкада мамлекеттик маалыматтык агенттиктердин жоктугунан улам аларга ылайыктуу жооп берүү мүмкүн эмес экенин да кошумчалаган.
Маргарита Симоньян АКШ бул кадамдарын Украинадагы кырдаал жана атайын операциянын жүрүшү боюнча чын маалыматтарды бергени үчүн жасаганын айткан.
* Meta ( Facebook жана Instagram социалдык тармактары) ишмердүүлүгүнө Россияда экстремисттик уюм катары тыюу салынган.