БИШКЕК, 13-сен. — Sputnik. Маданият тармагы болуп көрбөгөндөй саясатташты. Бул тууралуу РФ лидери Владимир Путин Санкт-Петербургда өтүп жаткан Биргелешкен маданияттардын эл аралык форумунда билдиргенин РИА Новости жазды.
"Гуманизм менен даилогдун, өз ара сый-урмат менен ишенимдин маани-маңызын дүйнөдөгү көпчүлүк жакшы түшүнгөнү менен дайым кысымда, тобокелчиликте турат. Бул биринчи кезекте маданият тармагынын ашкере саясатташканынан, анын геосаясий куралга айланышынан, четтетип, баалуулуктардын улуттук системасынын маанисин төмөндөтүү аракетинен улам болот", — деген Путин.
Өлкө башчысы Россия өзүнүн баалуулуктарын ыйык тутарын, бирок эч кимге таңуулабай турганын белгилеген. Ал маданият дүйнөнү сактап келгенин, бирок кайсы бир мамлекеттерде ал сыпат жокко чыгып кеткенин кошумчалады. РФ лидеринин айтымында, кадыр-баркы бийик деген саясатчылар адеп-ахлактык чектен чыгып, кол тийгис деген нерселерди унуткарып коюшкан.
"Ушундай элита башкарган өлкөлөрдүн эли да бара-бара алгач ксенофобияны, андан кийин дискриминациянын оор түрүн да кадыресе көрүнүш катары кабыл алып калат. Мындай кырдаалда башкаруучу режимдер кандай тездик менен адамдыктан кетип, кесепети канчалык оор болорун баарыбыз билебиз", — деди Путин.
Президент дал ушул себептен улам салттуу баалуулуктарды жогору баалаган адамдарга гуманитардык колдоо көрсөтүү боюнча жарлыкка кол койгонун белгиледи. Бул кадам эли тандоо эркиндигинен ажыратылган өлкөлөрдөн түшкөн кайрылууларга жооп иретинде жасалган.
Путин мында кеп этикалык көз караштан алып караганда акылга сыйгыс мамилеге дуушар болгон үй-бүлөлөр жана неолибералдык стандарттарга кылчактоону каалабаган маданият ишмерлери тууралуу болуп жатканын тактады.
Өлкө башчысы Россияда маданияттын өнүгүшүнө чоң көңүл буруларын, музей, театрлардын, клуб, китепканалардын инфраструктурасы жаңыланып, храмдар кайра тургузулуп жатканын белгилеген. Анын айтымында, мунун баары гуманитардык багыттагы эле озуйпа эмес, региондорду өнүктүрүүдөгү маанилүү фактор да болуп саналат.
11-сентябрда Санкт-Петербургда башталган Х Биргелешкен маданияттардын эл аралык форуму 14-сентябрда жыйынтыкталат.