Бул сапар “Стоп кадр” уктуруусунда учурда Бишкектеги кинотеатрларда көрсөтүлүп жаткан “Аячы” тасмасы тууралуу кеп кылдык. Фильмдин режиссеру Сапар Сайназаров буга чейин комедия жанрына басым жасап келсе, бул анын драмалык триллер жанрындагы алгачкы эмгеги экенин белгиледи. Тасма бири-бирин сүйгөн жубайлардын үйлөнүү тоюна камданып жатканы тууралуу. Бирок кыз күтүүсүздөн оюнан кайтып, эч нерсе түшүндүрбөстөн мамилесин үзөт. Жигит өжөрлүк менен себептерин билүүгө аракет кылат. Ал кызды кайтарып, аны жубайы кылуу үчүн айласыз кадамдарды жасоону чечет. Башкы каармандар Бактыяр Шаршенбаев, Айжан Алтынбек, Алмаз Раимжановдор. Режиссер тасманы ар бир кыз, ар бир эне көрүш керек деп эсептейт. Мындан тышкары, Сапар Сайназаров “Аячы” фильми бир гана Кыргызстанда эмес, Москвадагы төрт кинотеатрда да коюлуп жатканын, жакынкы күндөрдөн тарта Казакстанда да прокатка чыгарын кошумчалады.