БИШКЕК, 11-сен. — Sputnik. АКШ позициясын өзгөртүп, жакынкы апталарда Киевге Россиянын аймактарына сокку урууга салган тыюусун алышы мүмкүн. Бул тууралуу Times гезити жазды.
Маалыматта тыюуну алууга америкалык администрациянын көпчүлүк мүчөсү ыктап калганы, анткен менен эми Ак үйдүн калган кызматкерлерин жана АКШ президенти Жо Байденди ынандыруу маселеси турганы айтылат.
Шейшемби күнү Ак үйдүн стратегиялык коммуникациялар боюнча координатору Жон Кирби АКШ мурдагыдай эле Украина Куралдуу күчтөрүнүн Россиянын тереңине сокку уруусун колдобой турганын билдирген. Анын айтымында, Америка Жо Байдендин Британия премьери Кир Стармер менен Украинанын Батыш берген куралды колдонуусу тууралуу сүйлөшүү планына карабай ушундай позицияда. Ал эми Axios басылмасынын журналисти Джулигрейс Бруфке АКШнын Өкүлдөр палатасынын эл аралык иштер боюнча комитетинин төрагасы Майкл Макколго таянуу менен Украинага барган Мамдепартамент башчысы Энтони Блинкен шаршемби күнү АКШ Россияга сокку уруу үчүн Киевге ATACMS ракеталарын колдонууга уруксат берерин билдиргенин кабарлады.
"Британ өкмөтүндөгү маалымат булактары АКШнын позициясы дүйнөлүк лидерлердин БУУнун Нью-Йорктогу жыйынына чейин өзгөрүшү мүмкүн деп божомолдошууда. Ишенимдүү тараптар АКШ администрациясынын айрым кызматкерлери пикирин өзгөрткөнүн, эми президент Байден менен дагы бир катар адамдарды ынандыруу калганын айтышууда", — деп жазылат гезиттин макаласында.
Басылма Улуу Британия менен Франция алыска атылуучу ракеталардын Россия аймагына сокку уруу үчүн пайдаланылышын колдой турганын белгилеген, анткен менен Киев техникалык себептерден улам АКШнын уруксатын күтүп жатат.
Россия Украинага курал-жарак жеткирүү абалды жөнгө салууну кыйындатып, НАТО өлкөлөрүн жаңжалга түз аралаштырып жатканын айтып келет. РФ ТИМинин башчысы Сергей Лавров Украинага делген жүктүн баары Россия армиясынын мыйзамдуу бутасына айланарын эскерткен.