Өлкөдө дин тутунуу чөйрөсүндө тартип орнотуу үчүн сунушталып жаткан мыйзам долбоору көп жылдан бери даярдалып келген. Долбоорду биздин мекеменин алдындагы жумушчу топ иштеп чыгып, буга чейин да коомдук талкууга бир ирет чыккан. Анда айтылган сунуш-пикирлерди эске алып, азыркы редакциясын иштеп чыктык. Буга мекемелер аралык комиссия да катышты. Мыйзам долбоору коомдук талкууга илинерден мурда эксперттердин, аалымдардын, дин тармагындагы адамдардын талкуусунан өткөн. Аймактарда талкуулар уюштурулуп, коомчулуктун пикирин да укканбыз. Бизде диний кырдаалды изилдөөчү илимий борбор бар. Мыйзам долбоорун жазарда алардын мониторинг жүргүзүп, жасаган иликтөөлөрү да эске алынган. Бул тууралуу Канатбек Мидин уулу Sputnik Кыргызстан радиосуна маек куруп жатып билдирди.
Анын айтымында, мыйзам долбоорунун жаңы редакциясы менен кошо аракеттеги беш мыйзамга да өзгөртүүлөр сунушталууда.
"Өлкөдө дин тутунууну жөнгө салуу багытында чоң мыйзамдар пакети сунушталууда. Ал кабыл алынган соң да башка укуктук-ченемдик актылар иштелип чыгып, ишке ашат. Учурда коомдук талкууда турган мыйзам долбоору боюнча социалдык тармактарда атайын терс пикирлерди жаратып, адаштырган маалыматтарды берген адамдар болууда. Мисалы, ошол эле адамдын жүзүн жаап кийинүүсүнө коюлуучу чектөө тууралуу сөз жүрүп жатса, мыйзамда кыз-келиндер башка салынган жоолук же хиджабды чеч деп жатат деп маалымат таратып, терс пикир жаратуу аракетин көргөндөр болууда. Биз, тескерисинче, салттуу диндерден четтеп кетпейли, коргойлу, өлкөбүздүн светтик макамынан чыкпайлы деп жатабыз. Светтик өлкө дегенде да атеисттик деп түшүнбөшүбүз керек. Бул жарандардын дин тутунуу укугун чектебеген, бирок саясатка динди аралаштырбаган, мамлекеттик, стратегиялык чечимдерди кабыл алууда динден алыс болгон мамлекет дегенди түшүндүрөт. Учурда жаңы сунушталып жаткан мыйзам долбоору менен кошо иштеп жаткан мыйзамдарга да толуктоолор кирүүдө. Ага ылайык, эми мечиттер диний уюм эмес, диний объект болуп саналат. Буга чейин мечиттер да диний уюм деп белгиленип келген эле", — деди Мидин уулу.
Ал сунушталып жаткан мыйзамдар өлкөдөгү бардык диндерге тиешелүү болорун, аны бир эле диндин өкүлдөрү өзүнө карата кабыл албашы керектигин кошумчалады.