БИШКЕК, 4-сен. — Sputnik. Жогорку Кеңеш Абсаттар Сыргабаевди транспорт жана коммуникациялар министри, Медер Машиевди жаратылыш ресурстары, экология жана техникалык көзөмөл министри кызмат ордуна дайындоого макулдук берди.
Президент Садыр Жапаров Абсаттар Сыргабаевди 11-июлда, Медер Машиевди 2-сентябрда министрдин милдетин аткаруучу катары дайындап, макулдук алуу үчүн Жогорку Кеңешке киргизген.
Жыйында президенттин парламенттеги өкүлү Алмасбек Абытов депутаттарды талапкерлер менен тааныштырды. Натыйжада эл өкүлдөрү экөөнө тең макулдук беришти.