Бишкекте президенттик администрациянын жаңы имараты, “Ынтымак ордонун” ачылыш аземи өттү. Иш-чарага президент Садыр Жапаров катышып, Ак үйдү салтанаттуу түрдө ачты.
Ачылыш аземге биринчи айым Айгүл Жапарова, ЖК төрагасы Нурланбек Шакиев, мурдагы өлкө башчы Сооронбай Жээнбеков, бийлик жана дин өкүлдөрү, депутаттар, ишкерлер, маалымат каражаттарынын жетекчилери жана башкалар катышты.
“Бүгүн чынында эле өзгөчө күндүн алдында турабыз, бул тарыхый окуя. Биздин команда жаңыдан иш баштаганда алдына дымактуу пландарды коюп, убадаларды берген. Ошол убадалар ишке ашууда. Жаңы имараттын курулушунда көптөгөн адамдардын эмгеги бар. Курулушту өзүм көзөмөлдөп турдум. Анын ар бир деталына терең маанини камтууга аракет кылып, тарыхчылардын, архитекторлордун, дизайнерлердин кеңештери алынды. Курулуштун ийгиликтүү аяктагандыгы үчүн министрлер кабинетинин төрагасы Акылбек Жапаров менен президенттин иш башкармалыгынын жетекчиси Каныбек Туманбаевдин эмгегин белгилеп кетким келет”, – деди Жапаров.
Президенттин администрациясы, өкмөт өкүлдөрү иштей турчу бул жаңы имарат эки жыл мурда салына баштаган. Ак үй "Ынтымак ордо" деп аталды. Жеринин жалпы аянты 25,7 гектарды түзөт. Бийликтин планы боюнча, президент азыр отурган Өкмөт үйү Бишкек мэриясына өтөт.
Тема боюнча: