БИШКЕК, 19-авг. — Sputnik. Россия "Түндүк агым" газ түтүктөрүнүн жардырылышын иликтеп жаткан Германияга расмий түрдө кине коюп, Берлин менен террорчулукка каршы күрөшүү жаатында эл аралык милдеттенмелеринин аткарылышы боюнча сүйлөшүүлөрдү демилгелеп жатат. Бул тууралуу РФ ТИМинин үчүнчү Европа департаментинин директору Олег Тяпкин маек учурунда билдиргенин РИА Новости жазды.
Дипломат Германия бийлиги Балтика деңизинде теракт жасаган делгендердин бирине издөө жарыялаганын, ал Украина жараны экенин эске салган.
"Германиянын ЖМКларында жардыруу жасаган адамдардын кайсы бир мамелекетке тиешеси жок деген тезис айтылып келет. Бул иликтөө чыныгы буйрук берген адамдарды таппайт, Германия өтөсүнө чыкпайт", — деген Тяпкин.
Анын айтымында, Россия буга макул болуп отуруп калбайт.
"Биз Германия жана тиешеси бар башка мамлекеттерден БУУнун антитеррордук конвенциясында каралган милдетин так аткарууну талап кылабыз. Расмий түрдө кине коюлду. Москва Берлин менен сүйлөшүүлөрдү демилгелеп жатат. Мындан аркы кадамдар Батыштын аракетинен көз каранды", — деди дипломат.
Россиядан Европага газ ташылган "Түндүк агым" газ түтүктөрүндөгү жарылуу 2022-жылдын 26-сентябрында болгон. 2023-жылдын мартында Батыштын ЖМКларында диверсияны "Украинага ыктаган топ" жасаганы айтыла баштаган.
Немец басылмаларынын маалыматы боюнча, түтүктөрдү жардыруу үчүн "Андромеда" парустук яхтасы колдонулган. Кемени 2016-жылы негизделип эки украиналык жаранга катталган польшалык Feeria Lwowa компаниясы ижарага алган. Бул боюнча Германия прокуратурасы дайвинг боюнча инструкторду камакка алууну чечкен. Ал диверсия жасаган топту ташыган унаанын айдоочусу болгон деп шектелүүдө.
Басылмалардын бири инструктордун сүрөтүн жарыялады, бул украиналык Владимир Журавлев аттуу дайвер тууралуу сөз болуп жатканын аныктоого жардам берген. Мындан тышкары, ага Светлана жана Евгений Успенскийлер шерик болгону айтылды.
Wall Street Journal гезити билдиргендей, немецтик изилдөөнүн көңүл чордонунда Украинанын Куралдуу күчтөрүнүн мурунку башкы командачысы Валерий Залужный турат. Басылма ЦРУ Зеленскийден түтүктөрдү жардырбай турууну талап кылып, бирок Залужный өзү билемдик кылганын жазды.